該死的濕疹

早陣子…醜樣B嘅濕疹越發越犀利,搞到醜樣B瞓覺晚晚都會痕醒好幾次,仲R到個頭同塊面損晒,真係心痛死人呀!

之前睇過幾個醫生都只係開D類固醇藥膏,搽完好返又再起,實在係治標唔治本…亦試過好多方法都係唔得。

最近…實在忍唔住再次帶Baby去睇另一個醫生,諗住問吓醫生關唔關奶粉敏感事,可唔可以轉豆奶…不過原來好醫生真係好難求,今次呢個醫生又話自己做咗40年,唔係肯好聽人講嘢,我哋想問嘅問題亦都答咗等於冇答:

米:『D濕疹會唔會關奶粉敏感事呀?』、『洗唔洗轉豆奶呀?』

e生:『濕疹有好多原因嘅,你哋想轉豆奶我唔反對…』

之前已同醫生講唔想再比Baby搽類固醇…但係醫生最後都係開咗一D類固醇藥膏比我哋,而且比之前D醫生開嘅類固醇更強…而診金唔該盛惠$380…

我哋冇幫醜樣B搽到醫生開嘅類固醇藥,反而轉咗豆奶之後D濕疹好似真係好D,

不過依然反反覆覆,但係就冇之前咁勁…

Baby就嚟半歲啦!

佢而家識得搖搖擺擺咁坐喺度(要有嘢“long”住)、識得反身,唔洗人幫都可以伸反隻手出嚟、識得企(要有嘢挨住)、你講give me five,佢會亂咁拍你手掌,但你講握握手,佢就會停住隻手等你握、肚餓嘅時佢會識得喊住咁『奶奶奶奶奶奶奶奶(不停奶)』、比支水水同奶奶佢揀,佢會識揀奶奶、最鐘意睇電視同埋望住風扇轉轉轉、最鐘意聽「ABC song」 同埋「健康歌」、最冧屎人嘅絕招係對住你嗡起個鼻kaka聲笑……