韓版花樣男子

係考完mock的lee幾日,我終於忍唔住開左韓版花樣男子黎睇
慘喇,洗濕個頭就要日日追添
一連睇左5集實在有好多感想
我要先集中講一講我對韓版的整體感想,以及同原著的比較



牧野築子(,由於台版的關係令全世界都將個名譯做杉菜,
                                  但我實在比較喜歡原著的譯法)

未睇之前對於劇入面的築子係一萬個不滿意的(因為同真央比較佢差太遠喇!)
但睇硬照,佢外貌老到令人覺得佢唔似高中生,情況同當年的大S相似
睇左5集之後,我開始能夠接受到佢,劇入面的佢都尚似一個學生
(其實成間學校的人我都覺得老成左D)
可愛,幾靚女,眼好大,但始終唔認為佢似築子
第一:韓版將築子演繹成一個不斷鬧人,嗓子超大的惡婆,lee一點最差
        漫畫入面的築子雖然會鬧人,但並不常見,而且對住道明寺,
        佢經常都係無佢咁好氣
        通常道明寺有佢講無人講的畫面會令我覺得好惹笑,
         但係韓劇入面經常出現築子好大聲鬧道明寺的畫面
         呢樣我絕對覺得係一個敗筆

第二:韓版築子欠缺築子強硬、不肯向惡勢力屈服的感覺
         漫畫以及日版花樣都有強調築子一開始「懼怕」F4的心情
         後來迫不得已要企出黎保護朋友,進以搵返自己的勇氣,勇敢面對4個惡霸
         呢個劇情的發展令我愛上築子lee個角色,亦係顯示佢與別不同的重要劇情
         可惜係韓版入面就無強調築子心情上的變化,反而一開始已經係個
         天不怕地不怕的強悍少女......
         我只能夠話我個人非常唔鍾意呢一點,亦因為咁我完全唔認同韓版築子

第三: 韓版無好好演繹築子的傻氣,,築子lee個女仔係一方面係好精明堅強,
          但另一方面,佢對愛情係一百個遲鈍而且鍾意自言自語,,自己呃自己
          好似係道明寺約佢出街個段,佢呃自己人地根本唔係lee個意思,,
          而且仲猶豫左足足成日,先衝去肯定......呢個段落係韓版入面,
         我睇唔到個種唔知去唔去好,想去但又要呃住自己的矛盾性格
          (係愛情上其實築子都幾矛盾)
          韓版築子好似係預算道明寺會等佢,只係估唔到佢肯等佢咁耐
          anyway,我交代唔到自己的諗法,總之欠缺左個份傻氣,
          對築子的好感又減少一分


道明寺司

lee個演員實在好似好似言承旭!!!超似,,好似兄弟咁。
外貌方面,佢的確係最貼近原著的,有成186cm,又係F4入面最高的
不過韓版道明寺亦係少左一個成長的進程,,
明明道明寺係由一隻無感情的野獸,,因為築子的關係而變返一個人,,
但係韓版就少左呢種感覺。
韓版用行為來表達道明寺的無理(炒人、打人)但忽略佢背後的寂寞孤單。
韓版道明寺單純變左一個行為差劣的大少爺,
而築子改變佢內心的一段就變得膚淺左,道明寺與築子lee一對就無咁令人窩心


花澤類


呢個人,,我認為佢根本就唔係花澤類
經常露齒笑,,多管閒事,,幫唔識的人抹面,,輕易與人有眼神接觸
咁樣的花澤類仲成世界?!?!
幸好我唔係花澤迷,如果唔係我一定嬲到想扼死佢
總之呢個唔係花澤類的物體,我只當佢係一個角色


西門總二郎

呢個超超超靚仔的人,我對佢的感想就係好靚仔,,靚仔到不得了
但我又未覺得佢似西門,,可能係唔夠輕佻的關係,其實松田翔太都唔夠輕佻
個人認為花花公子個種輕佻唔係攬住兩個女人就可以交代到

美作伶

我暫時對lee個人未有感想,因為佢都仲未有咩戲份

藤堂靜



呢個女人如果唔講野,我會覺得佢比日版藤堂靜做得更似
可惜把聲比較沉,眼神亦太過銳利,,欠缺左藤堂靚應有的溫柔
睇漫畫的時候,我本來就唔係太明白藤堂靜點解會咁鍾意築子lee個女仔
睇日劇,反而感覺到藤堂靜對築子的愛護以及溫柔,係姐姐愛護自己妹妹的感覺
睇韓版,藤堂靜同築子就欠缺左呢種交流,只有前輩後輩的關係,
更加令人難以理解築子的特別待遇
「好的鞋子會帶女人去一個好的地方」呢句算係藤堂靜最經典的對白
不過講完我都無留意到,而築子聽完,亦無左個種從心底入面佩服
總括而言,韓版藤堂靜少左漫畫入面個天仙的感覺,,睇的人產生唔到距離感
令人羨慕的同時,又不得不佩服以及喜歡佢
以上係我對藤堂靜的感覺,台日韓入面的藤堂靜都做唔到




雖然批評好多,但其實我並唔係覺得韓版花男唔好睇
以一齣劇黎講,佢係我睇過最好睇的韓劇
(基本上,花男的劇情只要跟住黎拍就已經係超好睇)
我好欣賞佢肯落重本去拍,無晒浪費左花男入面所訂立的華麗背景
韓版F4雖然唔似F4,但外型出的確係非常令人滿意(特別係西門)
而且韓版最好係集數多,可以拍晒所有我鍾意的經典情節
好似築子比人屈完,道明寺衝去救佢,抱起佢,話:「只要你說你你沒有,我就相信」
呢一段係日版竟然無左!!!!!十萬個可惡!!!!!
睇韓版的時候就可以滿足晒喇



睇到第五集,我已經完全脫離日版的影響,獨立去睇
不過我亦唔太覺得自己係睇緊花男,因為每一個角色都唔神似,而且D名仲轉晒
到依家我都只係背到具俊表lee個名........
anyway,,我相信我依然會愛上道明寺的,,我實在太鍾意道明寺喇
無論係邊個演繹,,只要佢大體上的行為唔脫離道明寺的設定,,我都一定會愛上
大家遲d見到我鍾意左韓版道明寺,千萬唔好以為我變心啊!!