活力901第四週保方大戰保方打成1:1平手

今晚喺九龍仔踢第四週聯賽,標題寫到保方大戰保方,原因何在?因為對方守門員著咗件03/04粉紅色保方...不過相比起嚟,今場我呢個保方犀利啲!熱身時高飛低撲,幾乎所有波都救晒,唯獨係阿KEN球勁射救唔到...

上半場戰情不太緊湊,佐治左輔位一下射門僅僅高出...而對手有一下半單刀喺我出迎時射高﹏跟住我哋差啲失守,對方一下直線,基本上我可以輕易解圍,點知天雨路滑左腳剷出去時跣腳,對方截到個波窄位射去龍門,幸好阿仁包返空門不致失守...阿KEN一下射門又被對方守門員封位擋出,結果上半場兩無紀錄!

下半場開波初段阿KEN一下突擊喺對方守衛追趕下笠射,個波喺守門員頭頂入網為球隊領先1:0!之後就激烈喇...對方前鋒引球壓過兩個隊友喺十二碼點抽射,被我飛身右手撲出,回身再右手將個波擒住時仲俾對方前鋒一腳踢落前臂度﹏阿KEN有兩下半單刀因為太離腳無功而還...佐治有一下補射空門又被對方守衛頭槌頂出。對方一下快攻喺左路禁區角起腳,我飛盡左手拍到再中柱彈出﹏本來以為可以1:0贏波,點知臨完場前阿蘇回防時跣腳喺禁區內剷跌對手,球證直指十二碼...對方主射嘅十二碼被我飛身右手拍出,可惜喺我回身前對方另一個球員補射遠柱入網,結果就以呢個失球同對方打成1:1平手!

雖然未能全取3分,但大家都踢得唔錯,再加上見到自己狀態大勇,嗰種感覺非常之好...本來喺聯賽戰績係1勝3和,但因為輸俾我哋嗰隊調咗組,所以而家應該係3戰3和,惟有之後再努力啦!