09/10意甲第三週祖雲達斯作客2:0擊敗拉素三連勝

意甲第三週嘅賽事,祖雲達斯作客拉素結果憑首度喺聯賽上陣嘅卡沙利斯同聲稱季後離隊嘅查斯古特各建一功,以2:0擊敗對手並且締造三連勝!

10分鐘阿馬利接應傳送心口一彈俾查仔窩利抽射,梅斯利拿托出底線...13分鐘甘仔右路一下笠射又被梅斯利拿神勇救出!20分鐘哥拉洛夫左路高速推過祖記兩個守衛左腳重炮直飛近柱,保方飛身右手拍出!

23分鐘甘仔一下"施丹式轉身"被掃跌,迪亞高罰球被守門員雙槌打出...5分鐘後拉素一下快開罰球,巴朗尼奧起腳遠射被保方撲出,不致於重蹈對羅馬嘅覆轍!30分鐘拉素一記罰球直飛近柱下角,幸好保方用腳擋出...告魯斯補射又被保方沒收。43分鐘基奧雲高入替受傷嘅迪亞高﹏

上半場完場前拉素罰球混戰中射入,但球證判告魯斯侵犯歷高達利在先入球作廢,結果祖記領先1:0完上半場!

下半場開波無耐巴朗尼奧一下遠射被保方沒收...馬治斯奧遠射高出。53分鐘基奧雲高快開罰球,格羅素左路傳中,可惜球速太快,阿馬利飛到盡都頂唔到...

及後甘仔兩下射門都無功而還...68分鐘基奧雲高傳俾阿馬利可惜射得麻麻!71分鐘祖記卒之打開紀錄,馬治斯奧右路傳中,個波混亂中彈出嚟,卡沙利斯十二碼點附近踏順步韻一抽遠柱入網,首度為祖記聯賽上陣就取得入球!

88分鐘告魯斯遠射被保方沒收未能扳成平手...到咗補時3分鐘祖記鎖定勝局,阿馬利引球打反擊傳俾基奧雲高傳中,拉素守衛頂出不遠,阿馬利補射被梅斯利拿撲出,伏兵城下嘅查仔補中射成2:0!

最後祖記以2:0擊敗拉素取得三連勝,為聽晚歐聯主場迎戰波爾多打下一支強心針,美中不足嘅係迪亞高受傷,聽晚應該唔出得...不過相信祖記應該無咩大問題嘅,聽晚睇下數幾多粒啦!