聯賽第十五週2:4不敵安聯

尋晚喺青衣踢第十五週聯賽,不過喺酷熱天氣兼得十二個人嘅情況下以2:4不敵安聯!

好似踢咁耐業餘比賽都未試過成個球場綠草如茵,今次都係第一次見...

開波隊友們都唔太集中,根本個個都未上力...10分鐘被對手先下一城,對手一下高波落地阿仁踢漏,前鋒後上喺我出迎時推過射入空門!5分鐘後對手更藉一記遠射再下一城,個波炮彈咁直飛近柱,我都只係僅僅掂到近柱入網!落後兩球隊友們先醒...25分鐘卒之有反應,佐治左路地波傳俾阿KEN撞射入網追番一球落後1:2!但係完上半場前又被對手快速入楔呃過大鵬攞大位單對單狂抽,我本能反應已經擋到,可惜依然入網落後到1:3!

下半場隊友們開始入局,奈何阿仁好似有啲中暑跡象要被逼退下火線,我哋要十人應戰...對手亦憑快速反擊,前鋒一個扭過三個隊友單刀燙遠柱中柱彈入落後到1:4!唔好以為我哋會放棄,反而放開懷抱豁出去...結果憑細傑一記美妙傳送,阿KEN發揮射手本色壓過對方守衛窄位狂抽入網追成2:4!之後對手一輪攻勢,好波之人喺越位之嫌下單刀勁射被我救出...佢另一下禁區邊勁射被我飛身撲出,隊友伏兵城下補射入網但旁證示意越位在先入球無效!完場前我哋有個黃金機會可以再拉近比數,細傑恰到好處嘅角球,TONY頭槌勁頂彈地直飛死角但被對方守門員撲出,結果以2:4落敗!

雖然輸波,但雖敗猶榮,下半場十個打十一個都只係1:1...始終上半場初段未入局,再加上佈越位方面出現問題,好多被對手單刀入楔嘅機會!希望15號大埔惡鬥另一隊勁旅可以多啲隊友參與,踢番今場下半場嘅表現啦...