祖雲達斯第三十一週作客2:3不敵熱拿亞

一場眼火爆嘅比賽...到咗今日依然餘慶未消!

實在唔明阿雲生究竟係咪傻嘅...喺國米被巴勒莫逼和嘅情況下都唔識好好把握機會,明明佳基拉OK又要出薛比拿...唉!

開波6分鐘柏拿甸奴接應右路傳中心口一控壓過薛比拿左腳一射,保方落地救唔到...不過歷高達利護空門解圍!1分鐘後伊亞昆達突破越位推過對方守門員射入,但旁證舉旗示意越位在先入球無效﹏15分鐘施古利禁區頂射個地波被保方橫身接實。之後尼維特追入禁區前被撞跌,球證竟然無任何表示...28分鐘熱拿亞憑一個具爭議性嘅入球領先,美斯度引球推進臨入禁區被撞跌,球證洛基"吹雞"示意犯規,但後上嘅莫達一射貼柱入網,洛基竟然判入球有效...既然吹咗就代表無俾得益,又點可以判入球有效??實在豈有此理!

32分鐘甘莫蘭尼斯右路開出角球歷高達利頂高...43分鐘球證又有一個爭議性嘅判決,費拉利清脆剷走迪比亞路腳下球,但球證直指12碼點,隊長親自操刀射成1:1!

仲以為上半場以1:1完結之際,補時3分鐘熱拿亞一個角球,莫達接應一頂遠柱入網,MARK佢嘅正係廢柴薛比拿,隔成兩三個身位,想唔入都難啦...結果上半場以1:2落後!

下半場4分鐘伊亞昆達接應保臣傳送一控,左腳第一時間射門可惜太正被沒收...53分鐘薛比拿失波後回防從後踢跌柏拿甸奴被罰黃牌!3分鐘後達哥接應右路傳中頭槌回後俾尼維特左腳射門,可惜比亞華護空門,之後尼維特右腳第一時間射高...

64分鐘球證又一"傑作"...甘仔一記攔截看似礙眼,但係已經收咗腳,最搞笑嘅係球證直接以紅牌驅逐佢離場,但甘仔又無抗議噃?!

70分鐘迪比亞路左路沿底線壓入禁區,喺無咩角度嘅情況下依然起腳射門,中間仲有個達哥都唔傳稍嫌獨食咗啲...

轉個頭基斯薛圖左路傳個靚波去遠柱,施古利近距離衝頂但被保方超快反應飛身撲出...不過之後阿雲生又出人意表地換人,佳基拉換薛比拿都正路,但明明想打三人防線,點解要換走表現不差嘅歷高達利?仲要換馬基安尼入嚟...83分鐘佳基拉傳俾尼維特再彈俾伊亞昆達,達哥喺守門員出迎前一"CHIP"遠柱入網扳成平手!

不過完場前3分鐘馬高羅斯突破越位再傳俾中路無人看管嘅柏拿甸奴掃入成3:2...如果唔係換走黑面神,呢個失波可能可以避免,最後祖記2:3輸俾熱拿亞,僅僅以2分領先AC,稍有差池歐聯席位真係凍過水!

多謝柏拿甸奴教訓一下班垃圾高層!