世界盃外圍賽歐洲區第8組意大利作客輕取黑山2:0

	Team	MP	W	D	L	GF	GA	Pts
	Italy	5	4	1	0	8	2	13
	Republic of Ireland	5	3	2	0	6	3	11
	Bulgaria	4	0	4	0	3	3	4
	Cyprus	4	1	1	2	4	5	4
	Montenegro	4	0	2	2	3	6	2
	Georgia	6	0	2	4	4	9	2

尋晚嘅世界盃外圍賽,意大利雖然作客輕取黑山2:0,但後防線屢現險象,納比實在有需要整頓一下!

開波僅僅6分鐘迪拿達利拉傷倒地,黑山球員竟然繼續比賽仲博到罰球...及後柏比入替迪拿達利。11分鐘黑山球員禁區內蓄意手球被罰12碼,派路一射入網領先1:0!13分鐘哥利亞列拿右路傳中,可惜達哥頭槌頂高...

之後柏林保回傳乏力,被祖維迪偷到,簡拿華路"跣腳"並借勢連出兩腳勾跌呈單刀之勢嘅祖維迪,幸好球證只係出示黃牌警告...實在大話夾好彩!不過對於意大利中後場班球員漫不經心實在有啲不滿,成日傳啲"醫院波",睇嚟佢哋梗係無汲取對巴西嗰場波嘅教訓!

22分鐘柏比接應長傳一射炒高...6分鐘後保方將對方嘅射門沒收。完半場前3分鐘基亞連尼大腳解圍爭啲射入,僅僅柱邊出界,結果上半場以1:0結束...

下半場4分鐘意大利一下反擊,柏比右路地波傳俾達哥射門,可惜佢竟然射中門前嘅哥利亞列拿...53分鐘迪羅斯一記射門太正被對方守門員沒收。66分鐘黑山差啲扳平,佢哋喺左路傳中,基亞連尼漏踢,對方前鋒喺越位情況下近距離射門但被保方"神救"單手拍出!2分鐘後後備入替達哥嘅柏仙尼接應迪羅斯妙傳射門但被守門員用腳閂出...73分鐘柏比接應哥利亞列拿傳中第一時間窩利射門省中人彈出底線。1分鐘後意大利擴大比數,柏比右路左腳傳中,伏兵城下嘅柏仙尼插水式頭槌頂入成2:0!

最後黑山破門乏力而意大利亦再無入球,結果意大利以2:0擊敗黑山,以5戰13分暫踞第8組榜首,嚟緊1號晚就會主場喺巴里硬撼第二名嘅愛爾蘭,到時如果贏波,首名出線就高唱入雲喇,希望可以改善後防嘅陋習,避免無謂嘅出錯,輕輕鬆鬆進軍南非吧!