第十篇網誌の再見阿叔前輩！

好耐無寫blog，容自己用兩年來第十篇網誌來向前輩致敬！

感慨！近幾日同香港足球評述員協會班手足傾緊出書，大家商議後仲打算訪問阿叔，點知今日返工突然傳來前輩已經仙遊！

自己不經不覺已經入行十幾年，但都未有機會同阿叔傾過半句，見面都好似只有一次！

其實未入行之前已經好鍾意聽阿叔講波，印像最深係自己仲係鐵人運動員嘅時候，記得有一次喺體院宿舍睇波(九幾年嘅事囉)，電視入面嘅阿叔突然彈一句：嘩個球員隻腳好似兩條billiard棍咁幼，點踢波呀！成班足球仔(當時足球部仲未解散)，猛話呢個阿叔講波勁過癮，笑得最大聲係豪豬，其實當時我都坐喺佢地後面笑緊！

阿叔講波講到興起嘅時候，如果佢拍擋(尤其係Ｄ藝人)問埋晒ｄ無聊問題，佢會口快快一句窒返轉頭，例如：無人叫你咁樣踢波架，傻仔！

多謝你為香港足球界特別係評述方面，作出的頁獻！

再見，阿叔前輩！

以前亦曾經有奇想，會否有朝一日阿叔出現於有線世界盃嘉年華，Anyway，致敬！