壹周刊訪問小威威後記

2009年11月4日, 對我黎講係一個大日子~~

呢一日除左係我40歲生日之外, 仲係壹周刊到訪小威威既好日子.

老實講, 我對咩咩喜慶日子一直都係冇咩概念既.... 如果唔係有人約我食飯, 我都真係唔記得左自己生日, 就連結左婚7年, 我都唔清楚自己究竟係邊月邊日出到貨,  真係樣衰

總之, 言歸正傳, 尋晚壹周刊既到訪, 先至係天大件事喇!!!!

不過, 唉.... 威威豬呢, 就真係失禮死人....

往日, 無論咩人上門, 威威豬都係天不怕地不怕, 從來都唔會走貓, 持住呢個係佢既地頭, 無惡不作, 爬你就爬你, 咬你就咬你, 一於同平日一樣咁"大支野".

但係, 尋晚小威既表現就好失準, 佢好驚青呀

攝影師同佢影左成個鐘頭, 個豬仔包先鎮定少少咁多, 後尾, 仲要出動到小食同汁汁罐頭, 佢先肯坐定定俾人影相....

不過, 記者姐姐話佢其實都已經好叻仔, 訪問加影相, 兩個小時之內可以完成到.

聽完之後, 我個心都定d, 因為初初我好驚阻住成team人收工, e家記者姐姐咁講, 我都開心返哂

個記者姐姐問我, 點解要領養威仔, 我就白白痴痴老老實實咁同人講, 話我之前其實係睇中另一隻貓, 不過個貓義工都唔覆我, 所以我等左兩個星期, o係hkcats見到小威, 就領養左佢....

其實, 我可以講得好toughing, 話我對小威一見鐘情, 唔介意佢失明, 都想同佢一齊....

不過, 問心o個句, 我真係從來冇當過威仔係有缺憾囉, 當然, 我對佢一定係有好感, 見到佢張相就鐘意佢, 先會聯絡貓義工啦, 但係, 我更加覺得, 之前我搵另一個貓義工想領養一隻四肢健全活潑可愛既小貓, 竟然留言再留言都冇人so我, 咁先造就到我同小威既緣份....

呢d, 應該係更加奇妙既天意~~

Anyway, 小威威篇專訪o係11月18日壹周刊出街呀, 大家買本黎睇啦, 多謝捧場