小威威大戰小拔三世

小拔三世已經32周+, 佢呢一月明顯活潑左好多, 成日撐手撐腳, 攪到咪媽個肚都變左形, 就算離遠幾個身位, 咪爸都話可以睇到我個肚左突突右突突, 好似有條大虫o係入面捐來捐去咁, 真係肉酸.

不過, 肉酸都係小事咋! 自從兩三個星期之前, 俾小威發現左小拔三世之後, 咪媽既惡夢先正式開始.

話說小威好多時都會入埋張被, 同咪媽一齊瞓, 咁兩三個星期之前, 有一晚, 當咪媽打側身, 同威仔攬住瞓既時候, 小拔就失驚無神大大力咁踢左我幾下....

踢到我都事小, 但係, 隔住層肚皮, 小拔踢到威仔就事大呢....

由當時開始, 小威就知道, 原來咪媽肚入面既家姐, 係可以同佢玩架, 所以, e家佢晚晚都走入張被, 1 2 3, 開波~~ 你踢我兩腳時我又伸返你兩野, 就係咁, 一玩可以玩成個鐘頭

佢地兩個就玩得開心呀, 難為我咋, 瞓又瞓唔好, 仲要俾佢地兩個夾住黎打, 好慘呀!!!!

其實, 芝麻都有咁樣玩過架, 不過我打完芝麻patpat之後, 佢就會停, 乖乖地瞓, 但係威威少爺, 就一於玩大過天, 唔玩到小拔瞓著左, 佢都唔會主動停手囉.

唉~~

激死