weekend again.

又到周末喇。
我亦都好自然咁從百忙中抽時間出嚟寫下周記。
Linda果條友仔，個個星期都有篇大essay要寫。
搞到我宜傢每日唔係爲咗佢D功課、就係爲咗CJ D練習而煩惱。
US亦都唔拖到最尾一刻都唔動筆去做。
Henry嘅就更加唔使提了…… 已經好自然咁被忽略到最後了。
宜傢諗起真係覺得有少少對Henry唔住啊。
阿門。我有罪。

好快就要去考SAT了。
眼見每個人都開始緊張喇、逼不及待嘅樣喇，
自己就仲喺度悠哉游哉咁。
好似一D逼迫感都無。
可能僥幸心理又喺度作怪喇。
最近忙學校D嘢都已經忙到一塌糊塗了，
翻到屋企個腦已經空白咗一大片。
完全無咩心思再去理其它嘢了。
就連SAT咁大件事我都已經唔想去理了。

果種感覺好頽廢。好似將未來都荒廢咗一樣。

最近日日都發老公仔脾氣。
都唔知點解近排特別躁，小小事都可以嬲一餐。
其實每次搞到老公仔咁痛苦果陣，
我都會有內疚感嘎。
可能係因爲太緊張、太在乎，逼得太緊喇。
老公仔，對唔住啊……
其實每次見到你唔開心同我講埋D晦氣說話果陣，
我個心都會好痛，痛到想喊嘎……

阿Rain已經翻咗廣州了。
佢同我講廣州變咗好多啊，果日喺體育西都差D蕩失路喔。
佢走咗一年多D就已經變咗咁多喇，
咁我到時翻到去咪真係要揾個嚮導？哈哈。

阿Sam問我幾時翻去。
話我出咗嚟咁耐喇都未翻過去。佢掛住我喔。
我話可能等我讀咗大學先呱。
其實我都唔知點答佢好。
我都唔知我幾時先可以翻去。
雖然我真係想翻去睇下。

中秋節果日，Henry上課同我哋講咗蘇軾首“水調歌頭”。
突然又諗起某人。
諗起當時佢同我哋唱果首“但願人長久”。
諗起最後一次同佢見面。
諗起佢send俾我嘅最後一條短信。
諗起溢仔同我講我走咗之後佢問起我嘅情况。

諗起果一切，我個心都係那麽感動。
青春年華，係一件幾咁美好嘅事。

從琦琦個Qzone翻出嚟之後，我諗起咗好多嘢。

當我哋經歷咗好多深刻難忘嘅事之後，
我哋都已經唔再係細路仔、細路女喇。

窗外嘅夜色大概都已經疲倦了。開始懶惰起嚟。
鏡中嘅某些人，你哋係咪都已經覺得攰喇？