春茗

一年一度嘅'小雨天'春茗又舉行啦，第一年我和揚拍住拖去，第二年我大住肚去，今年帶埋根女一家三口去。話說'小雨天'係一間台式麵店，老闆係一個女性，揚中學同學，會考只有ｌ分，但好有生意頭腦，短時間成為巨富，每年都擺幾圍請員工食大餐，這幾年我和揚、阿品、寶珠都會去痴餐。今年仲又食又拎，因為根女有大利是收，每年阿揚都會講：讀書唔叻唔緊要，最緊要識揾錢。

當晚我為根女精選了 一條紅色背心裙，內襯間條長衣，再加條黑色花邊飛女褲，可愛極了！(其實全部都係舊衫)阿根去到酒樓表現得好開心，有歌手(不知名)在唱歌，有人(阿叔阿嬸)在舞池跳舞，又有財神爺派利是(朱古力)，認真盡興而歸呢。