我返嚟啦!

真係好對唔住嗰啲成日click 入嚟睇我有冇update 既blog友!

除咗月頭嗰幾日假之外, 整個月都飛得好密, 真係好忙好忙…(我知, 侍魂實話我掛住打機啫) 係! 我認! 我有打機, 但並不是掛住啊!

七月一日人人慶回歸, 我就晨咁早要仆入屯門做姊妹(我住港島呵!), 夜晚去飲兼做司儀, 下塲仲玩到天光添! 真佩服一對新人精力旺盛! 之後成班又有再相約一齊食飯, 我哋一班舊同學真係好難得可以聚首一堂, 真係要多多出嚟catch up 一番, 但要約齊哂真係有一定既難度。

雖然係暑假, 但好好彩, 我要飛既航班都總有一個sector無爆滿, 算係中咗安慰奬。 但我嗰兩個星期既stand-by就無咁好彩囉~ 已經有一個long flight既roster, 再加上日日被公司called 到暈, 卒之─爆鐘!! 都唔知係咪天口興的關係, 差不多班班機都有機員不咬弦, 怪人又特別多, 有只係識用把口做嘢既印姐、 hyper神經質既坡姐、 煩過你呀媽再加你呀婆再加你呀嫲既參姐、 不負責任怕背黑煱既老總、, 血氣方剛衝動派新進青年、 口甜舌滑俾佢喺背脊插咗刀都唔知既中男, 好彩就遇到一個, 運滯起上嚟就打孖一齊上, 問你怕咪! 但當然, 大部份菰都係好好人既。  

而上個星期五係我今個月唯一一個星期五唔駛返工喺香港, 終於可以同班已經無見成個多月既聯合國盟友聚聚。 第二日就入咗DB同我個lovely little guy慶祝生日, 唔好誤會啊, 佢其實係我其中一個盟友兩歲大仔仔, 佢BB既時候我已經時常baby sit 佢嫁啦, 但佢哋成家搬咗入DB就好少見囉。 好在, 佢並無對我陌生, 仲時常將佢對沾滿茄汁既手同圍滿食物既咀貼近我塊面添! 等佢瞓咗之後, 我哋班大細路就開始BBQ, 直到深夜才離開。

整個七月就係咁, 眨下眼就過咗嘞!

P.S. 呀, 唔記得提我今個月去咗沙灘曬咗兩大次太陽添! 如無意外, 我同亨利佬明日會再去親親太陽~~