降溫ing

陪朋友買銀介指，要刻名。

朋友：「刻內圈好定外圈好？」

我：「刻(黑)起塊面仲好啦...」

唔該，背景音樂：包青天

有次朋友足球比賽。

朋友：「估唔到輪左，操到咁fit都輸...」

我：「唔怕啦，『輸』到用時方恨少呀嘛！」

我唔識安慰人，但「輸」真係一個教訓，唔跌過唔知自己衰係邊。

只能怪跌得唔合時，應該係練習既時候及早發現。

練完拳，係更衣室個個都話好熱啦~~

我：「汗有汗味，頭有頭味，我仲有幾分男人味！」

全部人：「‥‥‥‥‥」

話時話，我地果邊D女仔好鐘意係廁所一齊換衫，public area 果度，即係就算有其他女仔入黎都見到！我就一定唔會，我要去廁格關門換，就算大家都係女仔，我都接受唔到！

有晚同毛仔傾電話。

我：「我好少搭巴士，都係地鐵、西鐵安全D！」

毛仔：「點解？」

我：「因為有得轉車去下廁所，如果長途車急尿好慘架！」

毛仔：「咁你係咪每三個字落一次車？A_A」

我：「‥‥‥」

當年中三既週記一篇，：

「別人說，他的童年是一張白紙，那是平面的說法。我的童年卻十分立體，因為畫了陰影‥‥‥」

果陣Ms Lo 仲畫左個哈哈笑係隔離。

我都佩服自己做乜咁好文彩~~~

有個朋友 in 教院幼稚園老師。 (我朋友不是我)

考官：「如果有兩個小朋友打交，你會點做？」

朋友：「我會分開佢地....」

考官：「嗯，跟住呢？」

朋友：「睇下佢地想唔想打多 round.」

佢話當時諗唔到講咩，先搞下 gag，點知賴左野都唔知。

前幾日食飯。

我：「爸爸，有冇魚唔識游水架？」

爸爸：「你考起我！」

其實我認真，好想知！

細個果陣都問過類似問題.....

我：「爸爸，如果真係有外星人，但佢外型同隻狗一樣，咁仲叫唔叫佢外星人好呢？」

爸爸：「你小心D講野，可能班外星人已經監視緊你！」

仲記得果時驚到唔敢訓覺，好擔心比外星人捉走。

細佬考分班試，我幫佢溫數學。

細佬：「呢幾條公式背極都唔熟呀！」

我：「擺入微波爐叮叮佢就熟架喇！」

第二日...

細佬：「都係背唔到呀...@_@」

我：「你係張紙度寫低條公式，一碗水煲埋十碗水，飲左佢就識架喇！」

認真講句，我覺得公式唔使死背，做多D數就自然識用架啦！

只係，好難的起心肝去做姐......  有冇講中你心裡面條刺？

我既生活太多無聊笑話... >.<