31/10 - 4/11今次入院好辛苦!

31/10

早上9:00,我和爹地帶住健仔準時去到醫院,做完入院手續後,我地地就係病房度等外科和麻醉科醫生啦.對面床有個兩歲幾既哥哥,健仔好容易就和佢玩得好開心,一人推住張櫈仔係度玩.今日亦好順利,等到12點已經見晒兩位醫生,健仔可以請假回家,下星期一早上返來做取支架手術便可啦.

帶左車車俾健仔解悶

佢有車車玩,就梗係唔悶啦

玩得好投入添!

手多多,搞病房dvd機制

搵對面床既哥哥玩

呢張就係健仔既病床

下午健仔食完奶奶,準備瞓覺時,佢瞓極都瞓唔到,最後仲嘔晒d奶奶出來,嘔到成床都係,同佢沖完涼後,佢瞓左兩個鐘,醒左之後又玩得,又食得,我地都放鬆左.

1/11

到左星期日早上,健仔如常8點起身,食完奶奶,佢就去左大大,咁婆婆就帶佢落街飲茶.佢返來後,又去左一次大大.我中左感冒菌,成身痛,暈陀陀,健仔就交俾婆婆和爹地照顧住.到左下午3點度,我起身準備同大家去食下午茶,發現健仔又有大大,稀稀地,但唔臭,見佢好好精力,又食得野,我就諗住觀察下,無即刻帶佢去睇醫生.

夜晚我地由屯門返到屋企,婆婆跟我地一齊返,諗住星期一去醫院幫下手.8點鐘,健仔食完dinner無耐,佢又去大大,我開始擔心佢,同婆婆商量後,我地想帶佢去樓下睇下醫生.點知係出門口時,健仔突然嘔吐,望落明顯無咩心機.我即刻同佢去法國醫院睇門診.

醫生話佢未必係食錯野,可能上次既感冒菌入左腸胃,引致佢又嘔又痾.俾左d藥俾佢食.我除左擔心佢痾嘔之外,仲擔心咁樣一來,會唔會影響到佢第2日既手術啊.

2/11

好彩既係,健仔返到屋企後,夜晚都無再嘔和痾,平安渡過第2日,我地7:30到達醫院,如實將佢既病情告知姑娘,問過醫生後,佢地將健仔既手術時間延遲,雖然未能準時,但即日都可做到,我都鬆一口氣.

健仔今日由起身開始,都無笑過,好攰咁,去到醫院,姑娘幫佢"打豆"(i.e.係手背上打針),佢居然無喊,去到手術室,姑娘抱佢走,佢亦扭左兩下就無再扭計.手術很順利,唔使一個鐘就做完.我入康復室探佢時,姑娘仲同我講,未見到咁乖既BB,大家都叫佢做"樹熊健健",因為放佢上床時,佢攬實姑娘唔放啊~!聽到咁,我更擔心和心痛健仔呢.

希望係最後一次係度等健仔啦

泠冰冰既門,隔住左我和囝囝

唔知係咪做手術時著得太少衫,定係醫院既菌好多,下午健仔甦醒時又開始流鼻水,佢之前才剛剛感冒好番咋.......唉!6:00p.m.醫生簽字俾健仔出院啦.......真係太好啦~!

3/11

健仔係半夜2:30起左身,佢行來行去,一 陣佢就去大大啦,係肚痾,痾左好多水1,成條褲都係.我好擔心佢 - 佢感冒又起,依家又肚痾,加上手術後,身體一定虛弱,佢實撑得好辛苦啦!

下午健仔瞓瞓下覺突然喊,喊左好耐,食完奶奶仲喊,俾佢玩具又唔玩,只係要我抱佢,但都喊唔停,有時仲會孿起個肚仔.........望一望鐘......嘩!已經喊左45分鐘啦,佢未試過喊咁耐架......佢肯定係唔舒服,但就唔知係肚仔唔舒服,定係手術傷口唔舒服啦!一個鐘後,佢喊少左,但仲係好扭計,我於是帶佢去醫院check下.

急診室既醫生知佢既病歷,亦不敢怠慢,為佢照X光 & 超聲波,最後要佢再次入院觀察,當時我好驚,好驚有咩事......

上左病房後,有兩位醫生來睇健仔,check完一輪後,佢地否定左係手術後遺症,認為係過濾性病毒引起既.為安全起見,最好留低觀察一晚,仲要留大小便......呢樣最頭痛,因為健仔唔鐘意除片片去大小便啊,我和婆婆搞左差不多成個鐘,都唔成功,我地於是幫健仔請假返屋企試下.

4/11

早上健仔比我地早起,我趕唔切留低佢既第1次小便,之後就更難啦~!又搞左成個鐘,都唔得.醫院打電話來要我地返去啦.

去左醫院又一日啦,健仔終於俾我地留低小便,但仲未有大便,我地苦惱之際,醫生來睇佢,見佢今日再無痾嘔,於是俾佢出院.係醫院既時間,大人和細佬都好辛苦,可以出院而健仔又漸漸康復,我真係好開心啊~!

健仔一上到P5病房,佢就識得指住去遊戲室既方向啦.

呢度都幾多玩具玩,

健仔玩到唔捨得走

次次拉佢走都要扭一陣計

健仔經此一役,又瘦左好多,無左起碼兩磅,同佢沖涼時,見到佢無左個肚腩仔,手仔,脾仔都細左.等佢腸胃正常返,我又要再次谷佢食野啦.希望下星期二去醫院做核子掃描檢查時順順利利,無任何節外生枝啦~!