晒相 DIY

自從攝影數碼化後，好多人都會影埋影埋好多相，然後放晒上 facebook / flickr 等網站與人分享。

其實如果我地 d 相淨係放上網分享，用一部二百萬像素既相機就夠啦，使乜要 d 幾千萬像素既相機丫。用得幾千萬像素既相機，就梗係要將哩幾千萬像素既威力發揮出來啦。

點發揮？

咪就係晒大相囉。

我從來都覺得相係要晒出來先好睇既，最好仲係要有咁大張晒到咁大張，先至睇得過癮。我最初轉用數碼相機時，都會一路將我 d 相晒出來。後來到我開始影埋水底相，發覺街邊果 d 晒相鋪晒出黎既水底相好唔掂，所以我就好少出街晒相了。

幾年前，Canon 搞左個放毒大會，比佢 d 客戶試用佢地 d ink jet printer，我試完之後就即刻中毒，一直心思思想買個 printer 自己晒相。

後來，終於有人送左部 MP610 比我用。原來哩部 all-in-one printer 晒出黎 d 相一 d 都唔差，我覺得靚過用 mini-lab 晒出黎既相添。自此之後，所有 A4 size 既相我都會自己晒。

(用相機影返個 print out，好細緻呀。)

以上 d 相係用靚相紙印，每張A4要 $6.2，計埋 ink cost，未必會貴過晌出面晒。不過如果計埋 printer cost，就可能貴過晌出面晒喇。如果唔用 Canon 相紙，價錢會仲平。我試過比較下用 Verbatim 相紙晒出黎既相，同用 Canon Photo Paper Pro II 晒出黎既相有咩唔同。我肉眼上就睇唔出兩隻紙有咩分別。或者 Canon 果隻會無咁易褪色掛？不過要證明哩一點，就要有待時間既考驗喇。