週末來臨前的...

好悶下喎. 點解人返工我返工. 我會返到咁既? 會悶架喎? 又唔係無野做丫, 不過就係死唔願做咁. 成日都係做左少少野咁...(邊d趕到訓係到既咪做左佢囉...其他未殺到埋身都唔q理住...哈)

無計...唔理, 一於上上網. 但我睇晒平時去開既網誌, 都不過係十點咋喎! (仲要中間係有做野既忝!) 想話搵下d網頁睇下, 想學下css, 去整靚自已其他幾個網誌. 話時話, yahoo呢個預設既底都幾好. 不過都係台灣yahoo有多d既野可以揀. 我諗係因為台灣果邊要同無名鬥, 所以都要投放多d資源.

哈哈哈哈...呢個weekend會去露營. 話咁快又一年...今年有新野玩, 希望好天啦...家陣出面都仲係一片死灰咁...不過我其實一直對水上活動都有少少抗拒. 點解? 因為我唔算係識游水既. (謎之聲: 咩唔算係識呀? 識就識, 唔識就唔識啦.) 因為我唔會話一落水就叫晒救命咁, 但我又唔係果種毫無壓力可以輕鬆游水既人. 都真係幾鬼矛盾咁.

最攪笑都係, 我個friend話我地係會去玩tubing. 咁我唔知tubing係乜喎, 但又無睇人地send埋俾我既link. 咁就自已走左去孤狗一下啦~ 點知唔孤由自可, 一孤就出事. 點解頭幾個中標既係講政府呀, 咩民間團體呀咁, 猛係度話呢樣野好q危險?! 我諗住呢次去camp係無咩做, 提升下我既懶既經驗值架咋喎...乜要玩命架? 仲要係我唔多likey既水上活動?! 咦! 要俾快艇拖住玩架? 咁激?? 下? 仲會有高低?? 唔係下話...

嘿...最q得人驚都係呢句 - "only goes as high as you willing to fall". 死啦...我唔想跌死喎...可唔可以唔玩呀? 不如我地拎個釣魚牌, 去釣下魚咪算囉...駛唔駛玩咁盡呀? 咁再睇多幾個, 就發現係下面圖中呢個玩意. 嘿...仲激過wakeboard呀果d喎...不如一人退一步, 我地滑下水咪算囉...

嚇左一輪, 咁就同個friend講, 不如玩第二樣啦~ 佢話"下? 無乜野架咋喎, 我上次都玩過, 好安全既..." 我心諗, 唔係卦? 唔危險都好難講出口架啦喎, 你夠膽死話好安全忝?! 我個friend再俾左個link叫我去睇下...好啦, 睇下個網頁有無咩講可以令我安心d架啦...蝦~~~

條...原來係咁樣既tubing呀? 嚇得我丫...不過都話晒係水上活動, 都唔可以太大意既.