母親節前夕

聽日係母親節, 為左預留聽日正日0既節目俾我屋企人, 所以今晚6299就上黎我度食晚飯, 預祝母親節喇!

4點幾99就買左菜, 一大條白鱔, 同成隻鴨上黎, 點知6點幾62返到, 竟然又買左一盒白切雞同一盒薰蹄上黎加料, 嘩, 咁鬼多餸, 點食呀??!! 62又用佢d冇所謂0既口吻講:" 哦, 好閒0者, 咪食多d囉, 有乜所謂呀~" (會食剩好多架bor) "哦, 好閒0者, 呢d餸可以擺幾日都得0既, 慢慢食囉..." 食幾日! 嘿, 你食埋我份啦! 於是, 今晚就有3肉一魚一菜湯喇, 菜湯有乜料? 就係鴨頸鴨頭同菜心啦, 係咪好有"創意"呢??? 今日最高氣溫29度, 肥62竟然著左件長袖外套上黎, 真係睇見都熱. 佢一見到著住短衫短褲0既仔仔, 即刻好大反應咁話:"嘩, 乜咁快著短褲啦? 凍呀.... 著返條長褲啦... 唔得咁架..." 我同仔仔聽到, 都即刻"啤"一聲! 凍? 今日好熱bor, 你自己怕凍0者, 仔仔熱辣辣仲叫佢著長褲? 咪玩啦! 所以, 我都冇理到佢, 當乜都聽唔到! 過左陣, 62又叫:"咦? 乜佢d手手腳腳咁慶0既? 我隻手都冇咁慶呢! 佢係咪發燒呀??? 探下熱啦!" 我同c6都唔係好想, 但62係咁叫我地探熱, c6就唯有拎支探熱針出黎幫仔仔探下耳仔啦, 點知仔仔係咁擰唔想探, 搞左一輪, 都係要我出馬先幫佢探到熱, 一探, 36.9度, 我大大聲講"冇發燒喎!" 62即刻好冇癮咁唔再出聲喇! 到開飯喇, 62又講:"你有冇俾d爛飯仔佢食架? 食多d大隻d啦!" 我話:"有呀, 日日都食兩餐飯架, 佢健康就得啦!" 62又冇聲出喇. 食左一陣, 我就夾d飯俾仔仔食, 點知今次輪到99出聲:"唔好俾飯佢食啦, 難消化呀!" 我都未答佢, 62已經即刻講:"咩野難消化呀? 飯先容易消化, 有營養呀!!!" ................. 呢兩隻野, 真係極品到冇人有, 兩個勁煩之餘, 又成日互唱反調, 一個話東一個話西,  所以我兩個都唔會理! 不過, 再回味返佢地0既對白同行為, 真係好搞笑又頂癮呀, 哈哈~

食完半個鐘飯, 99話要趕住去附近睇香港運動會0既開幕禮, 於是就同埋62一齊走左喇, 而呢餐難捱0既晚飯都完結左喇, 謝天謝地啊~ 前後都係一個鐘, 呵呵!

尋日同工人agent簽左約啦, 終於confirm左一樣野喇~