濕地公園(上)

風和日麗0既假期, 最適宜作郊外遊玩~ 於是, 今日老公就揸車載我地去香港濕地公園玩啦, yeah~ 我地1點幾出發, 2點幾就到左濕地公園了, 嘩, 勁多人呀, 仲有好多bb同小朋友! 一出左部車, 就覺得非常之焗同熱啦, 雖然冇咩猛太陽, 但好熱呀! 而現場所見, 個個小朋友個身都貼左3-5張防蚊貼, 睇返仔仔, oh, 得0個一張, 好似危險左d喎, 不過附近冇店舖, 買唔到多幾張蚊貼俾仔仔, 唯有希望佢唔好俾蚊咬啦!

呢度環境好優美呀, 又冇咩野污染, 空氣好清新, 謀殺左我地唔少菲林呢~ 仔仔都好開心呀, 對所有野都好有興趣, 特別係去到紅樹林濕地區, 見到勁多0既紅色蟹仔同跳跳下0既彈塗魚, 佢不知幾興奮呢, 係咁伸個頭同隻手出去橋欄外指手劃腳, 又ee哦哦咁講野, 好搞笑呀! 睇黎佢真係好鍾意d小動物呢~ 行行下又見到一幅小小的草地, 好多小朋友0係上面追逐, 仔仔都唔執輸, 係咁跑呀跑, 行呀行, 好開心, 我地睇到都好開心呀~

玩到5點鐘, 就返入去公園入面0既快餐店餵仔仔食飯喇. 不過原來呢度5點就唔再俾人入黎, 我地係最後一匹, 食食下d人就走晒啦, 剩返我地幾個0係度餵仔仔, 周圍又熄晒燈, 仔仔又唔生性, 好耐都未食完飯, 感覺好孤清呀!

到6點, 終於捱完餐飯了, 於是我地就揸車離開濕地公園, 去左屯門市廣場行下. 我呢d住東邊0既人, 真係冇乜幾何入黎西邊行呀! 不過呢度都好旺, 好多人. 行左陣, 就0係"越棧"食晚飯. 唔知點解呢排仔仔同我地食飯時成日都坐唔定, 0係個位度郁黎郁去, 成日想落地玩, 又搞餐檯上0既杯碟, 搞到我地都食得好哩hair下.

食完飯, 住0係呢頭0既eliza就同佢老公就過黎搵我地見下面, 不過仔仔好似唔認得佢地咁, 怕醜地將頭埋0係我地度, 要warm up左一陣先可以鍚鍚eliza姐姐, 但對佢老公就...... 算啦, 異性相吸嘛, 男士們要加倍努力了~ 今晚仲有一位sales姐姐送左個大大紅色balloon俾仔仔呢~ 呢晚差唔多成9點先揸車返屋企, 好攰呀!

一黎到濕地公園, 仔仔就被d瀑布仔吸引住啦~

見到條靚靚樓梯, 影下相先~

黎到門口啦~ let"s go!

首先探下貝貝先~

呢度d風景太靚啦, 仔仔陶醉中~

今日仔仔又負責推車仔喇~

好靚的蓮花池~

呢兩父子咩野表情黎架???

仔仔對d水水好好奇, 不斷要探頭望~