展後感

參加Sculpture on Hong Kong Sea，其實只係一件偶然嘅事。當初收到學校嘅e-mail，覺得幾好玩、又有獎金，所以就去參加。主題係lightness，可以解作光，或者輕。於是隨手攞咗個汽水罐，做咗個風鈴，寫好proposal，就sent過去參賽。
經過第一輪嘅甄選，其實並未入圍；反而收到一份好似crit一樣嘅建議修改。去淺水灣睇咗一次環境，最終揀咗涼亭放artwork，因為嗰度夠當眼，結構上，又方便掛嘢。
終於入選喇！但係問題又嚟喇！經過修改後，作品大咗好多，需要嘅罐亦多咗好多。於是又要開始搵罐；亂衝亂撞，又俾打到去太古可口可樂廠，問到佢哋攞罐。
開始鑽罐、穿罐，但係又撞正assessment，加埋趕功課，真係忙到甩哂碌；結果開咗兩晚通宵，至穿得哂啲罐。
要裝到十幾呎高，又要租鋁架；好彩有阿良嘅提點，慳咗1700蚊。咁大個女，第一次爬到十呎高，連安裝，食咗三日西北風，加上早兩晚嘅通宵，結果病咗兩個星期，到而家都未好番。
不過作品嘅效果，同反應，都唔錯。又學到點樣搵source、計budget、裝大嘢；我呢啲做細嘅，真係有幾可以做咁大件嘢？
雖然最後因為大會搵唔到贊助，無咗獎金；但真係學咗好多嘢；希望亦都係一個邁向藝術家之路嘅一個好開始。