４９歲生日

昨天係生日前夕，契女亞雪專程入來同我預祝生日，首先一早我同蓮姐及亞雪，參加天水圍吹水會的長課，朝早７點２０分由天水圍運動場出發去尖鼻咀邊境路，來回２０Ｋ。

頭半程１０Ｋ天陰，都尚算清涼，亞雪係第一梯隊人羣中快放，亞雪Ｄ粉絲追住佢來跑，終於有幾個跟爆咗，而蓮姐係第二梯隊，我包尾大班。

當１０Ｋ折返後，太陽出來了，開始又曬又熱，體力同速度一直下降得好快，沿途無風，好焗，當返到天水圍河邊已經無晒力，跟住最尾呢４Ｋ，真係一步一步捱返去運動場，終於用咗２小時正硬食晒呢２０Ｋ，唉！死咗！

跑完大家一齊食早餐，午睡後就係戲肉，我哋一行５人，我同蓮姐、亞雪、肥海獅、肥蝸牛先去屯門三聖街買海鮮，再攞去流浮山煮，清蒸條２斤幾３斤重的東星斑，蒜茸蒸扇貝、蒜茸蒸聖子王，薑蔥美國大生蠔、豉油王炒大蝦。

啤酒、紅酒、白酒同 Lorena 送俾我的生日蛋糕，飲飽食醉，好開心，飲醉咗Ｄ。

多謝晒，明年５０歲，攪大佢。

今天係４９歲生日，朝早９點同蓮姐跑咗１０Ｋ，天氣非常之熱，非常之曬，起步時覺得小腿肌肉好實，以為經昨日一役謝咗，點知正式起步時，覺得好順，雖然天氣比前幾日熱，但跑起上來係有力，一路都幾順，Keep 住速度返來。

今晚同蓮姐、個女凱珊同女婿及朗朗仔去屯門食壽司慶祝生日。