炎炎夏日

上星期返早更，所以傍晚５點先至開始練，雖然中午仍好熱，但傍晚散熱快，都好大東風，所以跑起來都好舒服，由１０Ｋ至１６Ｋ。

今個星期返中更，下午開工，所以要係朝早練跑，路程１０Ｋ，星期日、星期一、同今日都係上午９點起步，好曬，２８度，濕度８６％，無風，所以特別辛苦，汗如雨下，好似跌咗落天水圍河。

近期部門出現嚴重斷層，比青黃不接仲嚴重幾倍，仲搞埋合併，我哋資深人員現在工作量多了幾倍，每日返工都係忙忙碌碌，樣樣嘢都要做，前線工作好多嘢都唔可以有遲誤，做完又要花好多時間整理文書工作。

四川大地震一週年，今我想起一件當年我個人認為警隊羞恥的事，反映香港年青一代警察的心態。

汶川係重災區，剛巧一對年青人係果個拍攝結婚照片，他們夫妻兩人都是香港警察，好年青，入行只有２、３年，他們帶同攝影師由香港飛到四川取景。

當拍攝期間，地動天搖，人間地獄，多少人被困等候救援，而他們正正在震央重災區，他們只顧逃命，用盡一切方法逃離現場返香港，他們接受傳媒訪問時都係話臨危不亂，冷靜地離開現場到安全地方。回港後，警務處長仲讚許佢哋訓練有素，處事不驚，冷靜地離開危險地區。

反而見好多當地人，自己雖然逃離危樓，但仍冒險犯難，將自己生死至於道外，衝回倒塌的樓房去救人，就如那個小學生，他雖然逃離校舍，仍即刻跑返入去已經倒塌的校舍，成功救出２名同學。

事後交通道路中斷，解放軍同救援人員徒步幾日才能到災區救援，而災區內有多少個家庭悲痛欲絕。

呢２個年青警察，只顧逃命，不參與救援工作，而當時他們正在重災區，無需長途跋涉，便可即時救援及搜救工作，可能救返好多人的生命，事實上，有好多人係等唔到救援人員到來便失救死去。

我給這２名年青警察的評話-------貪生怕死，就連一點警察的本能都無埋，更談不上負起保家為國的天職。

警察天職同本能是捨己為人，係危急關頭，寧願犧牲自己生命，都要救返他人，可能係一命換一命，可能係一命換到兩命，對警察來說，亦對救援人員來說，都係值得去做。正如荃灣大火的消防隊長同消防員，佢哋寧願將自己的氧氣樽同面罩俾Ｄ居民用去逃生，而佢哋就殉職係火場。其實佢哋捨己救人的精神，係值得俾個２個年青警察學習，當時２名消防員將自己維生面罩同氧氣樽俾Ｄ居民用，佢哋已經無諗住會有命出返來，只係覺得別人的生命比自己重要，看看２命換到幾多條命。

我處理過好多危險的事，亦試過隻身衝入火場救人，係個剎那間，只有沿途盡量避開危險，但生死已經擺埋咗一邊，因為已經打定輸數係出唔返來，睇吓呢次彩數有幾大，用一命可以換到幾多條命，火災內的人，一秒就係一秒，遲一秒佢哋可能已經燒死，所以唔等得，過程中盡量避開危險。

當入去前一刻，腦海浮現出愛妻蓮姐同個女，心裏最後一句話：老婆，如果呢次出唔返來，我想向你講句---------我係非常之甘愛你。凱珊，你要繼承父業。

閻羅王幾次都唔要我，俾我係人間繼續玩吓。

其實愛妻蓮姐係甘多年來都承擔住好大的心理壓力，佢知我份人性格，成日唔理自己安全，但係佢亦知道警察天職係保家為國、捨己救人，絕不能將自己保住而捨棄別人的生命，所以蓮姐做一個舊版警察的老婆，真係絕對不易。