極度辛苦的３０Ｋ

前幾日連續返咗３晚通宵更，昨日放假，瞓咗２個鐘頭，而蓮姐自己出去跑轉２４Ｋ，我瞓醒跟住要陪蓮姐同個女去買嘢，晚上係個女新居搞燒烤。

今朝起身，同蓮姐預備跑南生圍來回共３０Ｋ，點知一起步就唔多順，諗住頭幾Ｋ多數係甘樣，於是慢慢起，走到４Ｋ都係唔順，完全起唔到，心知呢次死梗，仲有２６Ｋ點捱，而蓮姐放甩我幾條街，背影都見唔到。

一於希望在人間，期望１０Ｋ可以順Ｄ，真係天意，到咗１０Ｋ歲仍然唔順兼起唔到，反而愈來愈辛苦，速度仲比初段慢，心中諗真啲，係呢度返轉頭，甘樣來回都有２０Ｋ，如果再繼續跑，就要入南生圍，一於死就死，有前無後，破釜沉舟，誓要完成３０Ｋ，於是者開始跑入南生圍，但速度不斷甘跌，其實個人唔係攰，雙腳又唔係無力呀，點解起唔到？難道返咗３晚通宵更唔夠瞓同休息，影響咗心肺功能，因為每次返完通宵更後第一次跑都會好唔順，完全起唔到。

未到南生圍盡頭，見蓮姐已經折返，佢都好好力，快咗我足足１Ｋ，我捱到南生圍盡頭１５Ｋ折返，其實諗過去坐橫水渡返元朗，少走７Ｋ，但係無甘衰仔，抄捷徑！所以繼續漫漫長路，一於當減肥，就是這樣一步步捱返屋企，３小時１０分，呢趟真係捱足３０Ｋ，辛苦到死。

原來蓮姐係臨尾３Ｋ爆咗，死頂到返屋企，得返半條人命。