蘋果日報 - 馮仁昭四圍超： now主持老蘭遭偷桃

2009-10-28 蘋果日報 (娛樂版)

馮仁昭四圍超： now主持老蘭遭偷桃YouTube熱播

左起：黎奕倫、郭嘉諾同依雯日前落老蘭同球迷近距離接觸，估唔到兩位男士俾人抽水。　互聯網圖片

啱啱過咗嘅星期日，英超勁旅利物浦大戰曼聯，睇住球員費蘭度托利斯屈機射爆雲達沙大快人心，而喺蘭桂坊做直播騷嘅 now Sports台靚女主持依雯，梗係更加興奮啦。不過佢兩位拍檔黎奕倫同郭嘉諾，就肯定幾晚都瞓唔着咯！
話說當晚 now Sports台同啤酒公司搞咗個 crossover活動，由依雯搭住拍檔黎奕倫同埋代表啤酒公司嘅郭嘉諾落老蘭一間酒吧做直播騷。場波踢到一半，班老外球迷已經起哄，到利物浦 2比 0打爆曼聯之後，幾杯到肚嘅老外直情癲晒。導演一 roll機，依雯已經企唔穩咁話：「我就嚟變咗三文治啦！」但仍然笑住採訪呢班失晒控嘅球迷。

now主持當晚喺人堆中做直播騷，未料有老外（箭嘴示）反手從後攔截，黎奕倫底線失守。

老外又施一記胸襲，黎奕倫面有難色。

鬼手重施故技，右邊嘅郭嘉諾都不能倖免。

跟住黎奕倫話：「嚟到蘭桂坊酒吧睇波，別有一番風味！」點知話口未完，身後老外忽然使出「龍爪手」，一嘢鍊落黎奕倫個胸度，黎奕倫未嚟得切定驚，老外再嚟個反手「猴子偷桃」，嚇到黎奕倫一仆一碌。老外得勢不饒人，鬼手徐徐從後伸出，結果郭嘉諾都唔能夠獨善其身。好彩依雯着咗條牛仔褲上陣，唔係後果真係不堪設想咯！
有人將呢條「偷桃」片段放上 YouTube，點擊率一日已經衝破一萬，都咪話唔堅！劉翔日前俾猥褻男熊抱，唔知佢睇到呢段片，會唔會覺得自己已經算好彩呢？

好彩果日我無被人搞呀!  

當日活動情況: 2009-10-25 NOW 電視睇波團 利物浦對曼聯 2:0