再見了 "永和號"!

過左年已經差不多一個月了, 都未祝各位 blog 友新年快樂, 身體健康, 萬事勝意,

心想事成, 事事順利.........恭喜恭喜! (唔遲唔遲, 十月都係拜年時, 哈哈.....)

咁講...即係我都積左好多野未 post 上黎!

每年, 將近過年的時候, 即年廿七至年三十, 我都勁忙, 因為要執屋, 大掃除!

成年先執一次, 你咪話唔忙呀! ( 執到癡左!)

所以, 每年都去唔到行花市, 加上我以前通常都係年三十晚先去, 仲多人!

依家老餅左, 唔想同人逼!

(家下仲多人啦! 都唔只係香港人, 仲有好多同胞, 唉.......逼到爆! 唔好攪!)

今年係過年前, 撞到個舊同事, 佢就約我係年廿八行花市. 係年廿八行花市,

我真係未試過! 就咁我就 ok 啦!

咁啱, 我個舊同事係中環返工, 而係呢個中環的永和雜貨店又係呢個日子榮休!

回想.......我由中學至工作時期都係在中上環, 堅島一帶, 我都留低左好多腳毛,

以前, 我都成日經過呢度, 好想去回味紀念一下!

呢個咁傳統的牌, 越來越少了, 之前的 "泰昌餅店", 都係咁無左!

呢間舖仲耐, 成個舖個格局都好少見了, 仲要係港島區!

唉.........呢d 現存的活化歷史, 已經被 d 貪心的業主, 地主, 商人及政府消滅!

(我諗.....歷史博物館都越來越唔夠用, 要搬去 "西九" 先得!.........

唔係喎, 咁攪法, 遲 d 連我地呢 d 老餅, 都要搬入去博物館呀!)

睇下, 最後一日, 有好多人黎懷緬一番!

呢個就係老闆和老闆娘, 另一個係客人, 我都有同佢地影相架!

嘩......呢個經典的第一代收銀機, 正呀! 令我想起舊時, 好懷念呀!

只係用一個大牛奶嘜, 加條繩, 加 d 重量, 就成為當時得令的收銀器,

每次去雜貨舖, 士多等買野, 當比錢時, 都好想玩呢個嘜, 見到個

老闆拉上拉落, 好好玩咁!

呢個位, 記得好似係放不同級數的米, 跟住係堆米度 (整到好似金字塔咁!)

插塊寫住嘜野米的牌.

影下影下, 都差不多八點鐘, 老闆要關門, 我地都好唔捨得離開,

但都無辦法, 呢個始終係事實!

再見, 我地將來再係歷史博物館見, 到時唔可以再買你地返屋企了,

 miss you, and see you later!

再見嘞老闆, 再見嘞永和號!