健康院

今次醒喇, 約三點鐘, 唔使咁趕嘛, 返到屋企點半鐘, 本身諗住同平時一樣, 四個一齊去, 點知奶奶話朗仔今朝有D鼻水, 叫佢唔好去 (放心, 其實我估係DD鼻敏感o架咋), 朗仔本身都好想去o架, 但最後都肯唔去, 我就叫奶奶都唔好去, 湊住朗仔, 我自己同妹妹去得喇, 咦, 今日咪好似係第一次淨係我同阿妹去街

我哋兩點三落去搭702, 兩點九已到, 好快就叫佢去磅重喇, 8.6kgs, 一見到呢個重量, 姑娘就叫佢度埋高, 因為原來佢個重量o係呢個年齡嚟講係重, 所以要度高去斷定佢係又高又夠重, 抑或齋重唔高要減肥, 好彩度完之後69cm, 屬於又高又重o者, 朗仔當時8.86kgs, 但可能男仔啦, 就無話要再度高

等到成三點半先叫我哋, 阿妹全程無扭過計, 聽聽話話咁坐o係我大脾等叫名, 同哥哥一樣, 一個人同佢出街係特別乖o架, 哈哈!  入到去姑娘問過晒平時食嘢o既情況, 知道佢平均每日飲五次奶一次糊仔, 佢話佢好好, 問佢食到幾多糊仔, 我話都有一碗, 佢讚阿妹叻

到見到個高度, 佢自言自語細細聲講咗好多次69cm, 又對咗好多次本紀錄, 話佢兩個月o個陣只係57cm, 第二條線, 今日一標標升咗三條半線, 話佢高得好快呀, 姑娘望咗我一陣, 話我okay高啦 (嘩, 咁都叫okay高?), 又問我先生係咪好高, 我估佢點睇都唔覺我個女會高卦, 所以當佢知道老公幾高o個陣, 都好似明白咗D嘢咁, 肯定就覺得我唔高, 個女無理由咁高啦, 佢仲想我哋見下醫生添, 不過都話只係見一見o架咋, 無事o架

等緊醫生o個陣, 阿妹好似眼瞓咁, 我就氹咗佢瞓, 跟住打電話匯報情況, Henry話一早話咗佢高o架啦, 但其實我真係唔覺得佢高o架, 肥就知o者, hehe, 四點半終於都等到醫生喇, 醫生左計右計, 話阿妹應該係遺傳, 佢第時會有152 - 169.2 cm高, 車, 個range咁大, 好似無講過咁, 佢再將阿妹D資料畫落另一個表, 話佢其實好標準, 肥, 瘦, 標準三條線, 佢o係肥同標準中間, 係好好喎, 一見完醫生, 阿妹就瞓醒喇, 出去約期約咗下年1月9號, 終於約到禮拜六喇, 哈哈!

我哋行返去搭702返屋企, 朗仔都問我哋做乜咁耐呀, 夜晚凱樺一家嚟咗食飯, 又幫手餵晴晴食糊仔添, 佢仲諗返起, 以前餵朗仔食粥, 如果食到最後一啖, 要同朗仔講聲o架, 如果唔係佢就會喊, 唔講我都唔記得添, 朗仔真搞笑, 但點解以前咁餵食o既朗仔, 而家咁o架呢??

喂, 遮住個口做乜嘢呀?

原來o係度食手指

同米奇傾乜呀?

晴晴心諗, 又關你事?

凱樺餵阿妹食糊仔

好好味, 咦, 哥哥o係度食雪糕, 都好正喎

你有你食, 我有我食

一齊"奏"眉

之後阿妹沖涼, 一落水佢就開心啦

今晚出面個景勁靚呀, 好想同你哋分享下, 可惜部機影夜影唔okay