原來有不滿真係要出聲！

話說我星期日（11月1日）朝早將我自己做的排版sample send俾麥田嗰個設計師，叫佢照住整，因為我費事再同佢deen，一陣到出年都未有相簿收就敝啦！我諗住佢照住來整，又唔駛佢諗，應該好快搞掂啦！點知嗰位先生係msn竟然同我講要10號先有！！！！！

我即刻火到嚟埋，我話：我之前明明一早話左俾你聽我十一月中結婚，你要10號先排好版？你係咪想我冇結婚相俾人睇？？？？？

佢話：不是呀，我要安排時間的．．．．．．（我唔記得佢講d乜啦，總之係廢話啦~）

我記得esd有姊妹講過，叫我地有問題可以打俾麥田的芳芳，佢上次都係芳芳幫佢搞掂番哂d野（佢遇到個更衰的設計師）。咁我就即刻打上去搵芳芳啦，因為我真係覺得忍冇可忍啦！我同芳芳講返成個story，由開頭未排版已講左唔好放字，到佢明知我十一月中結婚都話要10號先排好版俾我，芳芳話會即刻同我跟返，晏少少覆返我。佢之後打返俾我，話會叫我設計師加班，呢兩日即刻整好俾我，點都會係月中前有成品，仲叫我可以confirm埋邊張相做油畫先。咁ok啦，我就send email俾嗰個設計師話俾佢知我揀邊張相同點裁張相，然後係msn問佢收唔收到我email。佢叫我係msn話佢知個相片編號就得啦，我話因為我要話俾佢知點樣cut張相做油畫，所以整左個圖用email send左俾佢，叫佢睇。但佢一直係msn都冇話返俾我知佢收唔收到我email（我問左佢兩次佢都冇答我）。

咁我同奇哥講，不如我地同芳芳講話要換左個設計師啦，叫佢整左幅油畫先啦！奇哥都贊成，諗住第二日打俾芳芳同佢講。點知我地食完晚飯返到屋企，嗰個設計師已經跟住我的sample排好版，連埋cut好的油畫相send左去我email度啦！我諗佢一定俾人罵完，所以先咁快手做好俾我！我即刻睇下有冇問題，都ok喎（因為照住我的sample去做的），就send返個msg俾佢confirm ok，叫佢整相簿同油畫。今日我再打俾芳芳，佢話都confirm左已經send哂d相出去整成品啦，大約十日後會有得拎！

好彩我地講早d個婚期，如果唔係到臨尾就結婚時邊度得閒搞咁多野呀，到時一定冇相攞啦。我覺得麥田應該review下佢地現時的流程啦，最好就有一個客戶服務由頭跟到尾，唔好俾d設計師亂嚟，得罪d客人。今次好在我有上網睇到有芳芳呢個人幫手咋，如果唔係激死左未過年！

平時我見到有野睇唔過眼都會出聲，反而奇哥就通常會勸我算啦，多一事不如少一事。今次難得奇哥都同意我應該打去投訴，仲要講完真係有result喎！所以今次決定係正確o既！