麥田映像 - 揀衫

尋日同奇哥上去深圳麥田映像揀衫，我地搭火車由落馬洲站入境，再搭深圳地鐵到崗廈站，都幾方便。仲未行出地鐵站，已經感覺到出面有一股熱氣，行到出地面直頭覺得自己係個蒸籠入面！由於奇哥未食飯，我地行去麥田途中見到有間麥當當，就入左去買個餐食。奇哥叫左個一號餐，講普通話的職員只收左奇哥兩個半人仔，原來佢聽錯左，以為奇哥想要雪糕！呢兩個詞語普通話發音一d都唔似丫，都唔知點解會聽錯。奇哥話d薯條d味好怪喎，可能兩地d口味唔同掛。奇哥好快咁食完我地就繼續行去麥田啦。

去到麥田，有好多人係度試緊衫，清一色大陸同胞。等左一段時間先到我試。佢地唔太多款，婚紗款都ok（因為影出來件件都差不多），但晚裝款就．．．sorry揀唔落手，唯一有兩件睇落都ok的想試下，但咁o岩俾人著左出街冇得試。事但啦，一分錢一分貨，就試幾件算啦。Post d出來俾大家睇下：

上面的我揀左兩件白色，一件黑白色。一件影內景，其他的影外景。男仔就一黑一白。同埋我地要自備一套衫，可以係便服。我仲未諗到帶咩衫去。

我地試完衫之後就去左位於少年宮站的書城。我地第一次到呢個書城，好新淨的。除左賣書外仲有其他賣精品的鋪頭。有一間精品店賣好多龍貓的產品，而且仲好平添！我地估係大陸版license，所以先會咁平。有d好吸引，好可愛的耶～但亦有部份龍貓個樣似老鼠或者倉鼠多d（始終大陸的quality係特別d）。下次有機會都會買d靚靚地既返香港！係書城我買左三本學日文的書，只係廿幾蚊本，有埋cd可播mp3一邊聽一邊學！我一直想學日文好耐啦，但係我驚俾哂錢報名後我又成日放唔到工上唔到堂，side哂d錢呢！依家買幾本返去試下自學先啦！我地另外仲買左一本詠春書同一本英文書。

因為尋日實左太熱啦，我地都想快d返香港，所以冇食埋晚飯就返左香港lu。