停課的第一天~

2009年6月12日

由於 H1N1 關係, 教統局宣佈所有幼稚園、幼兒園、小學停課14日~ 真係晴天霹靂! 心情就好似被判 14日監咁, 而且晴晴仲有一科未考完tim.....

今日係停課既第一日, 亦係媽媽惡夢開始....為左自保, 媽媽決定運用返係醫院學既野, 係佢地身上, 等佢地一日過得充實d, 少d 時間發作....

今朝8點未夠, 2位就起身啦 (平時剷都吾起)食左早餐後, 第一件事係同佢地訂下一d 簡單既家居守則, 叫晴晴幫手寫低, 叫佢做 "擲名長" , 等佢有使命感...合作d 遵守~

跟住叫佢地2姐弟幫手做家務, 整理玩具後, 姐姐幫手摺衫, 大口仔就是但攞塊布比佢周圍抺下~ 然後就同佢地玩親子遊戲~ 

午飯後, 係做功課時間, 稍後就帶佢地2個去買送~ 係街市2個都爭住要攞魚....差d 大打出手...返到屋企就比佢地睇 442 , 同佢地沖完涼, 媽媽就開始煮晚飯~

好順利既一日, 無驚無險, 終於捱到爸爸放工啦~  媽媽雖然好忙碌下, 但總好過嘔到成地血....希望黎緊既日子, 都可以咁順利啦~