回門乳豬的控訴

今天我們和媽咪專程過去黃大仙做回門，（但我係由九龍灣出門的），都唔緊要，事原由我問姑媽其實老豆有無打算飲我杯茶開始，細姑媽就開始盡 心中情，話我落晒他們方氏家族的面，如果早知我咁對佢地，她們就唔會"夾"我老豆黎，四大罪狀如下

1) 老豆的衣著打扮 (註:此點連繫到其他罪狀)

姑媽話老豆日前試自己套西裝時，才發現因近日清減了，影響他著出來唔好睇，亦因我至此都沒有親自打過電話比老豆，所以同唔到我講，導致他無西裝出席我的婚宴？？

首先在老豆勁嘈我之前，佢話自己有西裝唔洗買，到佢勁嘈我至今(P.S.我無嘈返佢的，唔知咩事就睇返"經典裝修1,2,3")，我確實無聯絡過他，但我老公為咗我為咗比面方氏家族，佢已經有代我打過兩次電話給他，還要在婚禮前再補打多一次邀請他出席，他亦親口用好有型的口吻答應團長會出席，有幾型，如「團長邀請他早些到時，他答到時睇吓點．」"O"咀!，咁都答得出，點解無西裝著又講唔出口？到宜家返過來話因為我無親自打電話比他所以講佢唔到比我知～我老爺套西裝係佢自己去買的，我只租了一套晚裝比奶奶及媽咪，另外更換的一套+首飾都係她們自己去租、去拿、去還及自己比錢的，而且我們話比返錢，他們都話唔洗～～試問下其他人，著成點去出席任何宴會，都係比面自己，尊重場合，相對地如果要出席自己女兒的婚宴又應該點著呢？還要話怕我會在婚宴上比面色佢睇比說話佢聽，老豆：我成三十幾了，宜家又唔係十恕九仇，我會唔會在一個自己籌備了兩年的婚宴上搞事呢！可否平常心去想想，一個已有兩子一女的成年男人著成點，又係我有問題，唔係掛～～但最離奇居然係方氏家族都"認同"？？

宜家簡直搶晒鏡，張張有老豆的相都一定留意到佢，我可以話比大家知，除了方氏家族之外，有不少的人已經問過我、我老公、老爺、奶奶、大姑奶，媽咪、兄弟姊妹團同一個問題，「那個穿藍色格仔衫的人，是妳/新娘爸爸嗎？」．

2) 我應該一個人進場，都唔應該拖住我細佬進場！

姑媽話我拖住細佬進場好唔比面老豆，但實情當日情況我估大家都應該心照，唔洗講到出口啦，我根據老豆的衣著以為佢已經表態無打算要參與進場儀式咋，可是用教堂式進場，係我一路的夢想，而且我都會緊張的，老豆唔拖得都唔比我拖住自己個親生細佬進場壯壯膽，這又係咩道理呀～～

3) 我們沒有邀請方氏家族出來敬酒??

請搞清楚當時我們係無邀請過任何一個人出來敬酒的，我們都係由酒樓經理+司儀等通知我們行就行，到我一轉頭已經有群人包圍住我們前進了，奶奶老爺識自動出黎，陳氏家族懂自動出黎，兄弟姐妹團會自動出黎，原來遺獨方氏家族要一對新人親自去請先會出黎，而且經我追查後，有人證表示有職員邀請過方氏家族，只係方氏家族表示已經有很多人，唔出來了．這又係邊個錯呢？？

4) 主家席排位

方氏家族點解會被安排坐在陳氏家族的後面，宜家係"劉方聯婚"唔係"劉陳聯婚"，點計我老豆都養左我18年？？

我媽咪尚健在的，包括那18年來她都無離開過，他們生的我出，唔係佢地餐我，請問邊個養？而且我、細佬和媽咪一齊生活了三十幾年，媽咪又無改嫁，我的上頭/出門全都是由媽咪的陳氏家族幫我籌備，咁請問點解我媽咪唔可以坐在前面？？係唔係姓方的就有感受，姓陳的就無？？

我問返姑媽，我無要求過你們做什麼，點解宜家重要咁講？姑媽話返我，只係我無要求他們，連帖你們都想我自己，我重有咩可以叫你們幫我，打字定搬小禮物？