太陽報～2009年08月20日

徐子淇心痛大女跌倒戒食牛肉

四叔李兆基早前表示希望徐子淇生夠五個，子淇昨日出席活動時透露，會圓老爺的心願，可能一口氣生五個甚至七個！此外，子淇自爆因大女曾跌倒嘔吐，令她十分心痛！

昨日身穿Blumarine背心裙的徐子淇，以智行基金會慈善大使身份出席《Noodle & Boo-Luxury Maternity & Baby》發布會，接受品牌代理公司ZENSATION BEAUTE行政總裁何倍倩頒發的捐贈50萬港元支票。子淇送上一幅以手掌為主題的畫作，她坦言因市道欠佳，智行基金的善款比去年少四成，百日宴所得的善款仍計算中，估計有數十萬。
徐子淇送上一幅以手掌為主題的畫作。

子淇表示幼女頭大身又重：「可能佢太肥，暫時未識轉身，比家姐難啲。老公為個女健康着想，叫我同佢減肥，但我唔忍心，佢食少啲又唔得，惟有等佢大個叫佢游水減肥。」而老爺李兆基想她生五個小孩，子淇說：「佢咁好，佢話五個就五個，好感激佢明白事理，呢個係佢心願，佢鍾意我盡量生。哈！我好似中東國家啲家庭咁要生好多個，但For我哋老咗，如果生七個嘅話都好，每人每日返嚟陪我哋食飯。」她更自爆一年前大女跌倒後嘔吐，醫生指可能頭部有瘀血積聚：「我個心痛到係一世人未試過咁痛，情願我跌好過，所以我祈求只要佢冇事就呢世戒牛肉！老公笑我話個女有排跌，豈不是樣樣都要戒，仲叫我唔好戒一世，戒一兩年就好。但我覺得唔得，講過就要遵守！」
遲湊放學免囡囡曝光

子淇表示即使有人邀請一對女兒出席為智行籌款的活動，她也會拒絕：「唔想個女返學成為焦點，唔想佢哋曝光。（擔心人身安全？）都有少少，有時我覺得好慘，同佢去公園或買嘢見到有記者，就要即刻帶佢走，佢玩得唔盡興。」她透露為保持低調，待接放學的家長散了才接囡囡。