聖誕敍會禮物一開二

每年聖誕節都會同d舊同學；舊同事；老朋友敍下舊，交換下禮物，開開心心咁過～～～今年亦不例外！

通常，最早約出嚟嘅都係 YMCA嘅舊同學，不過今年比較特別，本應喺同一個敍會裡面收到嘅一份禮物，分拆開咗；敍會一開二，禮物亦一開二．．．好無奈，亦好可惜！

每個人，都會隨住自己不同嘅經歷而有所改變，亦都會被周圍嘅人影響，久而久之被同化～ 至於係好定唔好；進步定退步；就見仁見智嘞！

而我個人認為，人大咗，見嘅嘢多咗，唔多唔少都會“化”，好多嘢都唔會太過執著，亦都比年少時更懂得珍惜，尤其係身邊嘅朋友同家人，有事嘅時候，多得佢哋撐住，出手扶持，我先至無跌得咁傷、有氣力同勇氣繼續呢個長途賽。如果唔係，以我超級逃避責任嘅性格，老早就棄權，逃之夭夭～

從來，我都好挑朋友，唔係個個都可以，呢個係我嘅缺點。有Ｄ可以好 friend，好多話題不停講，就算唔講嘢但係個感覺都係舒服嘅；有ｄ就算好友善及有心想同我 friend，但係我會無嘢同佢哋講，硬哂軚，無話題，我都唔知點解真係唔得，我自己亦無能為力。

不過我份人太懶，好少主動搵人，但係我又覺得有時朋友唔係一定要成日見住或者搵住先至 keep 到，如果係真正朋友嘅話，好久先見一次都 keep 到嗰種感覺。

所以，一有朋友嗌交甚至反面，我都覺得好可惜！當然，我會勸下，但係，大家都係大人喇，反得面當然有佢哋自己嘅原因同道理，大家觀點與角度唔同，有時呢ｄ嘢，並唔係言語可以解釋到俾第三者明白嘅，所以我都會尊重佢哋最後嘅決定。

今次事件涉及到交情同祈望嘅問題，對我嚟講亦有反思嘅地方，做得朋友嘅，其實我唔介意同佢哋分擔／分享心事，同我講嘅我會真心俾意見，不過我亦唔會主動問／迫人講，可能因為咁樣，所以一向被人感覺都可 能係 君子之交又或玩樂朋友（又未至於係酒肉朋友啩～），之所以個個都話我好少同朋友反面／嗌交，並唔係我處理得好又或 EQ 高，而係個交情並未去到咁深啫！真悲哀！！！！有點受打擊～～～～不過我嘅性格係咁．．．改唔到！！！！

而且，每次我唔喺香港都會有事發生，真係邪！

最後，都係貫徹雙子嘅不負責任性格，講句：一切隨緣啦～～～～

p.s. 祈望將來嘅二合為一