掛到心痛

08年6月1日老二率先離隊去左一個新家庭，下午四點多走嘅時候不捨之情未有太強烈感覺，但係一入黑就忽然間好掛住佢，越夜越掛..越掛越難過..終於喺沖涼果陣豪哭起來自己都唔知點解會咁... 可能夜欄人靜特別多野諗

見到五小福你追我我咬你玩得好開心嘅時候諗起老二孤零零一個做緊咩呢?佢係咪掛住自己嘅兄弟妹呢?係咪好寂寞好唔開心呢?新環境習慣嗎?離隊嗰日天氣有啲涼..一個瞓會唔會凍?熱起上黎有冇冷氣?一連串問題縈撓在腦海...越諗越傷心越難過越唔開心

由佢地出世至今兩個月未夠，睇住佢地由老鼠仔般到識行識走識玩識跑而且極百厭, 雖然辛苦、激氣..甚至極唔夠瞓,有時希望所有新主人快啲接走佢地唔駛煩..

但完全冇諗過第一隻離開自己會有咁大反應...好辛苦好唔開心喊左好多場, 一諗起就喊..喊到眼腫鼻塞訓唔著...其實我都知老二只不過去左一個新家庭又唔係永遠見唔到，但一見到其餘嗰啲開開心心一齊玩唯獨是欠左佢就放唔開...雖然自知冇能力要晒咁多隻遲啲其他都要離開...雖然知道新主人應該好有愛心會愛錫佢..但仲係唔捨得..

總之一想起佢孤零零未習慣嘅時候啲眼淚就控制唔到,朋友驚我擔心尋日仲不停報告佢嘅情況畀我。知道佢一踏入新地方就賴尿...仲企圖賴屎知佢驚到唔敢行要黐住朋友，知佢冇胃口食得少尋晚仲有少少嘔奶怎不叫我擔心？後來知佢尋日下晝開始適應都放心左啲，但今日第二日仲係好掛住佢，甚至乎一路喊住打blog我都懷疑係咪自己有問題我都知狗狗好快適應新環境，但仲係不捨...但今日仲未有佢消息真係好掛住好掛住佢！

依家連其餘幾隻都唔想畀人(除左老大將會畀一個自己人比較放心之外)，老四同老五雖然最百厭，但佢地嘅新主人係2個只有十多歲嘅後生仔，佢地會懂得照顧我啲寶貝嗎？我真係冇信心，如果反口的話有人又唔開心...唉！做人好難好辛苦，如果冇心理準備去照顧一條生命的話...真係唔好有開始

一齊開餐食都食得開心啲，老二..你係咪見唔到班兄弟妹所以冇胃口呀？你要乖食多啲先會大隻架！知嘛？

(左至右) 大聲妹老五、前二文靜老二仔、後三嗲妹老六、前中間百厭仔老四、右二可愛老三仔、右一靚仔老大

呢張相彌足珍貴...係嘛？

坐喺新主人大髀，你個樣都好冧丫

睇下你幾百厭，喺新屋企唔可以咬野架！傻豬

好掛住你個睡姿呀！

記唔記得mami喺廚房整緊野畀你地食，你地捐晒喺度等食個樣呀

以後你一個玩玩具冇人同你爭係咪好唔慣呢？

睇下你同老三一齊瞓得幾sweet....

老二..你要乖要識去廁所要食野唔好扭計呀！知道嘛？唔好要mami擔心掛住你呀！希望有機會再見你嗰陣你要記得mami呀....

你要保重呀~~~~~~