人生中的第一個面試 - 2歲半的澳門幼稚園入學面試

2月28日急趕回來澳門為著是靖妮人生中的第一個面試 - 2歲半的澳門幼稚園入學面試...

一心只是想找一間近家的學校方便接送上學, 又怕你的臨場表現不好,由起初報2間, 演說成報了4間學校,朋友話我報得太多,辛苦靖妮, 但是, 怕她當時的表現不好, 起碼有 backup... 

3月5日, 密集式的面試展開, 第一間學校面試情況壞透了, 靖妮喊著要找媽媽...面試無法繼續, 靖妮滿臉淚的被阿e帶出來, 心想, 好彩仲有3間學校的機會...

3月7日, 分別有兩間學校, 一間是安排在早上, 另一間安排在下午, 一早起床預習一下面試有機會發問的問題, 看似準備充足, 點知那天早上的面試略為簡單,好像已經內定我的孩子不是該學校的收生對象,不妙...面試完畢, 食過飯後,靖妮午睡之後又再次出發去面試, 靖妮一入到該學校很雀躍, 跑來跑去, 到面試的時候, 靖妮發揮到水準, 玩的表演好合群又積極, 到答問題時, 有問有d唔答, 就算答都唔係標準答案. 

記得面試當天老師是這樣問靖妮的:

1) 小朋友食飯之前要做d咩o架? 阿囡沉默片刻不語, 我在一旁很是心急, 心想, 咁簡單的問題阿囡應該識答, 點解唔答呢...我有我驚青, 阿囡有阿囡發呆, 後來老師有提示, 指著靖妮的小手, 但係阿囡的答案係估唔到, 佢居然答...食飯之前要洗碗及洗菜...我聽完之後都笑咗出來,問你怕未...一係唔答, 答案係咁另類.

2) 小朋友天氣好寒冷應該要點呀? 你睇下d圖案,指俾我睇...阿囡就話天氣寒冷要著衫, 跟住手指指完件衫之後, 阿囡就求其指,指咗個波波同熊熊出來...激到我...

經過遊戲及面試,最後部分是體操音樂, 4個小朋友一齊跟住個姐姐跳, 阿囡有部分跟得上...當天的面試結束, 回家的途中, 我回想靖妮的表現, 我真的覺得表現得實在太好, 無論該學校錄取與否都不重要,重要是我覺得靖妮已經做到一般兩歲半小朋友的事情,我已經好滿足.

3月8日, 最後一間學校面試, 當天靖妮情緒一般,入到遊戲區時都不是太過雀躍, 到答問階段直頭害怕,因為當天面試老師的外貌不是太好看,靖妮害怕走來我處求救...我知道這次面試都應該付之流水.

綜合父母們為小朋友面試而作出的心理身理調節,往往在於小朋友的臨場表現是很難估, 只要父母及孩子已經盡力,那就足夠 !!

慶幸靖妮通過三關面試,有學校錄取, 得到人生中第一個錄取回條 !媽媽替你高興 ! 你的人生將進入另一階段 - 上學了 !!