我的煮意

今日下午要見客，見完客就提早左收工喎，六點幾咁早就梗係去街市買餸啦~~~

話時話我真係好耐無行過街市啦，係街市點買餸都差D唔記得左添呀~~~

黎到街市梗係要買新鮮既海鮮啦，我買左一斤海蝦呀，係街市買果然係唔同D嫁，真係超新鮮，超甜呀，而且都只係廿二蚊，真係好抵呀~~~

跟住上到去肉檔果層，我仲係到諗緊買咩既時候，突然令我諗番起以前一件好 "火羅" 既事，就係之前我本身想去買牛肉，我以為所以肉檔都可以買到豬肉同牛肉，咁咪是但去一個檔口羅，點知我去到一個豬肉檔果到，個阿姐話阿妹，呢個係豬肉檔，你應該去對面果D肉檔至啱嫁，真係好鬼 "火羅"呀~~~

今次我買左肉排黎蒸排骨呀，都係廿蚊，真係比超市又平又靚呀，蒸左出黎真係好味好多呀~~~

買完肉跟住就去買菜，係買菜又發生左另一個小故事呀~~~

賣菜阿姐：阿妹，五蚊三斤呀，又靚又抵呀~~~

我：(心諗又真係幾抵喎，我又望到個牌三蚊一斤喎）阿姐，我要一斤呀，唔該（因為怕浪費，所以唔想買咁多）~~~

賣菜阿姐：阿妹三蚊一斤喎，梗係買三斤抵好多啦~~~

我：都係要一斤就夠啦，三斤太多食唔晒呀~~~

賣菜阿姐：呢D菜係乾水嫁，你唔食唔好洗，就咁放係到就得嫁啦，千祈唔好濕水就得啦~~~

我：（見阿姐咁講，又咁抵喎）咁好啦，我要三斤呀，唔該~~~

賣菜阿姐：（收錢既時候）梗係買三斤啦，抵好多嘛~~~

於是我就攞左三斤菜行番屋企，原來三斤真係好鬼重嫁，攞到中途開始有少少後悔，因為真係好多呀，都唔知要食幾耐至食得晒呢~~~

呢碟菜只係冰山既一角渣，煮埋帶飯，袋菜都好似無郁過喎，真係唔知幾耐至食得晒呢~~~

呢餐就係我地既豐富既晚餐啦~~~

呢期真係太忙啦，攪到自己無時間煮飯，攪到自己又無飯帶喎，明天終於都有飯帶啦~~~