貪食小家庭

九月二十八日(星期日)

今早起身，無所事事。突然想入元朗行下，兜個圈食下嘢。於是，我們一家帶着懶散的心情，浩浩蕩蕩殺入元朗。

今日的主題以食為主，首先去田中日本料理食午飯。媽咪因陀住Di Di，有好多想食而唔敢食的嘢，有得睇無得食 ------ 肥美的三文魚剌身、雜錦魚生壽司飯、軟腳蟹手卷，通通都離我而去。  爸爸見我咁慘，話等我生完再同我食餐勁，補數喎！都算佢有良心!

食完午飯，即向佳記B仔涼粉出發。去到唔理三七二十一，即叫咗一大碗招牌菜 ------ B仔涼粉。唉! 真係好大碗，我哋會唔會眼闊肚窄咗d呢!  有好多生果係面，我哋三個好努力食呀食，好似食極都食唔完。 而亞仔一見涼粉，就即話要食龜苓膏喎! 鬼咩! 平時只要佢見我哋拿住個海天堂膠袋已知有得食，佢見涼粉跟龜苓膏的色水差唔多，咪要食龜苓膏咯。解釋完俾佢知後，又話要食涼粉，食吓食，食唔停，平時又唔見佢食飯係咁。幾經辛苦，終於食哂。媽咪真貪心，臨走之前仲要叫多個士多啤梨燸米滋攞走。

咁都不特止，隨後又即到恆香老餅家到買馳名老婆餅返屋企先肯離開元朗。所以，你話我哋係咪貪食小家庭。