貝貝家鄉一日遊之-南生圍

自從養左阿脾同埋搬左出黎自己住之後,都好耐無同您兩個人一齊出去玩啦,平時唔係帶阿脾去街,就係黎o係屋企玩,大家都無晒o的活力樣子,今日朝早天氣好好,我地就決定去南生圍,因為之前您話想去,咁就一齊去行下影下相啦.

o係官塘搭車入去,好快就到左新元朗中心,我地晏晝食左椰林閣唔熱既怪味紅酒燴西冷柴皮牛意粉同埋怪味豬扒,珍寶腸飯,呢間椰林閣係我食咁多個地方招呼最好既一間,但係同時亦都係我食過咁多間最難食既一間.

唉唔理啦,食完就出發啦,有人為左要保護佢件靚靚衫,所以臨出發前就要去買件衫替換喎..........,唉!

其實我都唔識路架,只係之前上網睇過一次地圖,print左出黎諗住穩陣啦,點知唔記得帶添,只係記得少少,咩轉左轉右........果o的,但係都好模糊,因為係前日睇架啦,但係行下行下都行o岩左,嘻嘻.

去到橋頭原來要坐一隻横水道過河架,呢位伯伯收每人五蚊一程,佢今日都好搵喎,一日最少都有百幾人搭呀,不過十蚊來回我又覺得值得既,因為好似去左另一個世界咁樣,好開心.

我地影影影,但係有一個男人成日踩住架單車跟住我地,又偷影我地,好得人驚呀,影樹幹果時好明顯佢見我地擺好post,佢又拎部機影我地,我地一影完就跳返落黎.....我仲用個背摭住您......哈哈哈,我諗佢又影唔到我地,死變態佬.

我地今日唯一影唔到果條木橋,行入去又要排隊影,行出黎又一大班人係唔係都影,所以我地放棄左,唔緊要啦,我地有機會先再影啦.

我地今日影左好多好多相,好耐都無試過兩個人去影相啦,影完我地仲去幫阿脾買左包糧,同埋食左上次唔記得食既串燒添,仲有人話要買元朗老婆餅........行呀行呀.......行呀行呀..........行左唔知幾多條街,總於見到恒香啦..........好彩中途有杯思樂冰消下暑,如果唔係我地應該會暈倒.