青心直說 胡孟青 2009 12 29

炒高鐵點只鐵路基建股

年紀有番咁上下嘅讀者，應該記得廿幾年前地鐵廣告有句 Slogan：「搭地下鐵路，話咁快就到」。隨着內地武廣高鐵正式通車，象徵我們又再踏入一個新時代：「搭武廣高鐵，未話完就到」。因為呢個四橫四縱嘅其中一「縱」，將湖北、湖南及廣東 3省，以高速鐵路連成一線，全程廣州至武漢由 10小時縮減至 3小時。
早前介紹過廣深鐵路（ 525），佢中、港、美（ ADR） 3地上市嘅特性，有助鐵道部他日將優質鐵路網注入，股價急升一輪至 3.63元後急插水，一度出現「 14連陰」嘅驚嚇場面，唔止震走散戶，就連最大嘅基金股東霸菱都震走，喺 12月 7日趁反彈以平均價 3.119元減持，持股量由 8.17%降至 7.35%，之後股價當然冇運行，但落到 3蚊邊似乎有唔錯支持。

周邊地產旅遊商機多
屋漏兼逢連夜雨，廣深 A股喺 22日有 26億股解禁，不過亦意味其 A股完成股改使命，正式於市場全流通。業績雖然未有起色，但鐵道部宣佈國家鐵路貨物統一運價，平均每噸公里由 9.61元加至 10.31元人民幣，加幅 7%算唔錯，中金繼續 Call Buy。投資者等唔切佢嘅潛在注資空間，又睇唔起畢菲特投資鐵路股貪佢穩陣現金流嘅特性，亦可留意內地鐵路大計嘅周邊投資機會。
單係武廣高鐵，全線 1068公里 15個站，每個火車站就係一個新發展城市，配套包括銀行、酒店、住屋、醫院、商場，更重要係拉動區內旅遊零售業發展。單係廣州市嘅消費品零售總額就佔全省 40%，而湖南今年頭 3季消費增長近兩成，當中汽車銷售升 44%，以湖南作為中部地區樞紐，帶動整個 3小時經濟圈嘅力量不容忽視。
要食呢一浸浪，睇地產股要睇粵派地產龍頭，例如碧桂園（ 2007）、萬科同保利地產等，當中又以碧桂園喺武廣沿線佈局較全面，發展項目包括韶關、長沙、武漢、咸寧等。除咗地產，當地旅遊亦升溫，旅行社紛紛搞「坐高鐵、逛武漢、遊三峽」短線團，剛剛練成少林功夫嘅香港中旅（ 308），調整完回升亦可望多兩眼。