網誌分類：投資逹人 |
國家扶持盈利有保證
眾多新能源中，風電同水電目前發展最好又最穩陣，好過成本高嘅太陽能同仍在研究階段嘅生物燃油。中國承諾新嘅減碳排放目標，所以風水電等零排放嘅電力供應，中央必定會提供大量優惠去扶持。
龍源電力（ 916）係內地最有規模嘅風電廠，風電機超過 160台，總裝機容量達 3032兆瓦。除佔盈利貢獻 69.4%的風電，龍源亦有些少江蘇煤電廠，但近年盈利貢獻已減少 35.9%。兩種電力的毛利率亦相差好遠，風電只需開頭建設同維修開支，毛利率高達 56.5%，煤電則受煤價影響，利錢約係 23.3%，所以公司講到明以後集中做風電，呢次集資 175億元，會擴建風電產能，希望明年底前提升一倍。
龍源料獲注入風電場
龍源風電毛利由 06年 32%，幾年間升至近六成，好明顯係隨住更多風電場落成運作，進入收成期，享受到風力「無本生利」嘅好處。唔單止唔使本，眾所周知，上網電費係國家定價，由於新能源受國策扶持，現時風電廠生產每一度電，即使用唔晒，電力公司都要照單全收，而且電費明顯比煤電貴兩三成，現時龍源平均每度電費收 0.4653元人民幣（下同），旗下煤電只得 0.3601元，亦解釋到點解風電咁好賺。
為咗吸引投資，去年 1月開始投產嘅風電設備可享 3年免稅，其後 3年可享 50%回贈，所以去年集團着數咗 1.3億元，佔純利 17%。即使政策有變，都要到 2011年先要交番 50%稅。仲可以賣越炒越貴嘅二氧化碳排放量配額，去年就賺咗 1.2億元，今年頭半年再進賬 1.2億元，佔純利一成半。即係話，超過三成純利係來自政策主導的盈利貢獻，政府配合時當然好爽，一旦風向有變，他日要整治行業產能過剩的話，將是龍源一大投資風險。
不過，至少呢一兩年中央都會全力撐風電發展。龍源母公司國電集團仍保留新疆 5座共約 250兆瓦的風電場，有機會注入；招股書仲輕輕帶過話會發展太陽能、生物燃油等新能源，剛好阿媽樣樣有齊，擺明係為他日龍源成為新能源巨企鋪路。
