網誌分類：投資逹人 |
中航科工具注資概念
貧富懸殊越來越嚴重，窮媽媽又窮又多嗜好又愛賭，要打造全世界最大博彩王國，無論獅城又好，馬交都好，都要起最大最靚賭場，又唔望吓豬仔錢罌空空如也。於是窮媽媽不惜削女肉還母，將辛苦湊大的女兒包裝成皇帝女出售。相反生於富貴人家，有國企富媽媽照料的幸運兒，即使坐喺度打跛雙腳，一樣可以飯來張口。
好媽媽除咗近期嘅華潤創業（ 291），中航科工（ 2357）阿媽中國航空工業集團，早前亦將深圳上市的中航光電 43%股權注入，換取中航科工旗下東安動力控股權。跟手仲成功將佢重組，許配給中國兵器裝備集團阿仔長安汽車。
呢單刁係近年中國最大宗汽車業併購，亦係首宗國企汽車重組，到時成立嘅新長安汽車將會爬東風集團（ 489）頭，成為內地第三大車企，年產能達兩百多萬輛。
有富媽媽關照
呢次富媽媽講明由於有大把錢同業務，搞汽車唔再係佢杯茶，不如專注搞飛機、直升機等業務，只留番約兩成股權當收息搵餐茶錢。呢次重組中其餘汽車業務包括哈飛同昌河汽車，目前控股股東都仲係阿仔 2357，即係話一樣可以分享以後新車廠嘅利潤。
富媽媽早打算喺 3至 5年內，將 8成資產注入 21間 H股及 A股，而 H股選擇得 3間，分別係 2357、 161（深圳中航）同 232（中航工業）。
冇記性嘅可能已忘了 07年高峯時於深交所上市的中航光電，風頭拍得住中石油、神華、建行等知名國企，當時凍結破紀錄嘅過萬億元資金。唔識嘅會以為佢係光伏產業太陽能股，實情佢係國內最大連接器（ Connector）生產商，即係類似插蘇、寬頻線之類，民用有中興等大廠用喺手機，高級版連接器用喺神舟六號，部份軍用嘅仲通過防爆、防核爆、抗輻射測試。 2357目前已控有阿媽 3間 A股，重組第一拳就選佢，可見集萬千寵愛於一身。富媽媽大把貨，但市場卻唔係太多投資者識貨。
