台灣之旅2009之第二天

來到第二日既行程了，今朝早八點起身，然之後就去食早餐，雖然並唔係一啲咩豐富既早餐，但係就食得好健康，我鐘意！

當食飽之後，我地就去左祈禱，然後就向清境農場出發了，起初以為响賓館附近，原來農場同我地住既地方係有一段距離，我地行過去都行左差唔多四十五分鐘，仲要係全山路，超辛苦！

不過沿路既風光真係好靚，天氣又非常好，係海拔千多米上欣賞呢啲風景真係好舒服

好不容易，終於唻到目的地，不過有啲失望，因為所有草都變成枯黃色，跟上次來的時候差好遠

所以我個人認為來清境農場，選擇夏天才是最佳之選，又唔熱（只限山上）

之後就去睇綿羊秀，不過好可惜，今次既表演無左上次睇既剪羊毛，無驚喜，今次來到清境，真係令我有啲失望，隨便找啲羊影下相就趕住落山check out喇！

Check out之後，我地又肚飯喇，但時間唔容許我地可以舒舒服服去餐廳享受，所以我地响7-11買左個杯麵食就算喇

然之後我地又再去等客運去埔里，今次認真大鑊！我地兩個人既喼都好大，客運係無位置俾人專放行李，所以我地要抬上車箱，一上到車箱就想叫救命，皆因車箱實在太少，而且兩排與兩排之間只容許站立一個人，我地既行李根本就比人既身型闊，放係中間一定會令後座既人唔可以落車，我地唯有夾硬一人擺佔兩個位，一個俾行李坐，另一個自己坐，我地狼狽既舉動引起車內既人投以奇怪的眼光，唉，總而言之超尷尬啦！

好不容易，我地終於來到埔里，原定計劃我地係要再轉另一架客運去台中高鐵站，因為有個台灣弟兄怡舜會响嗰邊接我地，所以我地一去到埔里就搵台中既車，可能因為太急既關係，我地無睇清楚架車係去台中邊區，只係見到台中兩個大字就急急腳上車，去到總站落車既時候先知道上錯車，又笨左一次！之後咪再打電話俾怡舜，話俾佢知個情形，最後我地又再坐的士去到台中藝術館等怡舜囉！

當終於見到怡舜後，實在太開心喇，因為我地唔駛再推住兩舊大石周圍走，可以放上車自由自在咁周圍玩喇！舒服晒！

第一站，精明一通街 & 春水堂，去到精明一通街見到有幾間賣衫既shop，都幾靚，所以入去望望啦，嘩！價錢平到呢，左試右試之下買左一件外套（如果唔係失業，我諗我會買多幾件），我無記錯的話，好似等於港幣百鬆！買完衫，我地就春水堂飲好出名既珍珠奶茶，聽講春水堂係全台灣最貴食珍珠奶茶既舖，但點解都平過我地香港既仙跡岩既！

之後我地三人又响台中市中心出發喇，夜晚我地再約左另一個台灣姊妹多多响市中心見面

呢間古典玫瑰園係台灣好出名既餐廳，不過入去食野既人都好似貴族咁，講野要陰聲細氣，最好就唔好發出聲音，用眼神來溝通就最好，唔講野對我唻講好辛苦架嘛，所以我地响門口影張相就算啦！之後我地再响附近既藝術街行下，然後就去左附近一個好細既夜市，皆因我實在太貪玩喇，所以我就去左坐多多既電單車，哈哈

在夜市玩完一輪之後，多多就要先離開返屋企，而怡舜就車我地返去我地今晚要住既地方→逢甲夜市旁既民宿，呢間民宿只可以用三個字來形容→平、靚、正！我無法想像我同Vicky只係每人夾HK$100就可以住間咁靚既民宿，實在無得頂呀！

整頓行李之後，我地再向逢甲夜市出發喇，怡舜帶我地去食蚵仔煎

之後話俾我地知點行之後，佢就先行離去了，不過我地兩個都係行多一陣就返左民宿休息喇，因為今日朝早既車程令我地好疲倦，好想返去瞓覺！抖足精神，聽日再去玩過！