台灣之旅2009之第八天

來到行程的最後一天了.......滿是不捨得......

今日係八日行程以來可以瞓得最晏既一日，幾乎十點半先起身，因為今日係大年初一，無乜地方可以行，即使有得閒都係啲大型既shopping mall，例如Sogo......

起身刷牙洗面之後已經見到桂芬準備好蘿蔔糕等賀年食品，實在太感動了，不在家的日子仍可以感受到新年氣氛，實在難得！

係桂芬媽媽親手做既蘿蔔糕！

啲雲吞真係好好味，夠細粒，又唔多肉，好味！

食飽之後就响姊妹之家周圍影下相喇，當我一路影就一路唔捨得，五晚以來都係居住响呢度，如果我唔係基督徒的話，相信我都幾難可以咁親身接觸台灣既生活方式！

上下兩張相都係大廳既一部份

前面就係通往唔同既房間

通往天台既樓梯

天台其中有部份位置係姊妹既工作間

推開天台道門之後就會見到台灣地標101，响呢度祈禱好舒服架

每次我地去街都一定要經過呢條小路

影完相之後，我同小涼就向忠孝復興路出發，因為小涼要去買阿默蛋糕做手信，原本我都無諗住買架，不過見到呢間舖既外觀唔錯，賣既蛋糕又好似幾好樣，見小涼買三個，又見自己仲剩左啲台幣，所以我都買左三個，一個送俾舊BT，另一個就送俾啲好朋友，另一個就留返俾自己同屋企人食

買完蛋糕之後，又向曜明百貨進發，今次輪到我要買手信，因為我既麻煩家姐千叮囑萬叮囑我一定要買一隻叫義美牌既朱古力餅俾佢食，所以就行左幾條街先唻到呢間專門店，不過呢隻餅又真係幾好味，不過我想話唔駛突登唻到呢度買囉，原來7-11都有得買，不過只係細盒啲啫！

我地兩個買完野之後，本來都好想繼續周圍行下，但真係無乜地方有開，周圍都好靜，唯有返姊妹之家，所以提醒大家，如果有機會唻台灣最好就唔好選擇年三十晚同年初一，會有啲悶！

返到Household之後，執下行李，睇下電視，傾下計，都已經四點幾五點了，原先我地既計劃係搭捷運再轉高鐵再去機場的，但連日來，行李既重量不斷增加，由Household推著行李去捷運起碼最少半個鐘，只得我地兩個女子，確實無比既痛苦，所以我地最後決定電召的士！約左的士六點鐘响Household樓下等，突然間，我聖起Household係無lift，即使桂芬幫手抬行李都唔係一件容易解決既事，最後我地決定提早半個鐘落樓，平時落呢條樓梯，用一分鐘唔駛就可以好輕鬆落到樓下，而家就真係要左我條命，幾經辛苦，三人合力先將兩嚿磚抬落樓，想死！

七點未夠，我地就去到機場喇，先將行李check in，但我地既行李實在太恐怖了，竟然超重！！地勤小姐叫我地將啲行李抽出唻hand carry，但我地諗下諗下覺得好唔方便，因為返到香港又要一抽二"lun"，好輪盡，所以我地最後決定豪俾佢，補錢，幾多錢......唔好提喇！

放完行李之後，我地就向Hello Kittty候機室影相喇，而且仲响精品店買左個Melody返屋企添呀，超開心！

返到香港已經十點幾，拎埋行李都差唔多十一點，由於好想快啲返屋企，但如果搭E車的話會兜好耐，而且落左車又要上上落落，抬住個行李實在好困難，所以我就搭左A車去新城市，然後再轉的士响屋企樓下落，再叫阿爸落樓幫手推行李，十一點半，好快地返到屋企了，急不及待去廚房食久違了既阿媽私房菜，實在太好味了！然之後去沖涼，再執拾行李瞓覺了......

就係咁樣，好快地完成左我呢八日既台灣之旅！好唔拾得呀呀呀呀呀呀呀！