由今日開始, 我要.....

呢個blog , 都荒廢左好耐。

講真, 一直都提唔起勁寫, 因為我對香港社會好心灰。

同香港人講環保, 就好似教猩猩計微積分一樣。即使我講幾多百次, 做任何野, 佢地都係無動於衷, 佢地只係對蕉有興趣。

咁我應該點做先可以得到更多人對呢件事既關注呢? 因為好多人對我既堅持係抱住蔑視既態度, 認為環保既人好多舊魚。俾面既人會表面認同你, 唔比面既人會一句到未話死左就最環保啦。老實講, 我真係極度認同。我真係認為人類係唔應該再存在, 因為所有既問題都係人類而起。正確講, 係因為人類既貪念同自私而起。

我成日見到D人用好多紙, 用好多膠袋, 日日食外賣都唔用自己既餐具, 我覺得好沮喪。喂大佬, 個地球我有份咖, 你有無理過我感受? 你有無公德心? 你破壞佢就係剝奪我既權利, 我唔嬲就假。就好似D賤人, 明知戲院唔食得煙, 佢照食不特只仲用煙噴你一樣。

我好似講太遠了。點都好, 我都好希望我可以再做多D野去改變我身邊既人。而由今日開始, 我就同大家分享下我生活入面點樣盡量環保D, 節約D。

我自己覺得環保既生活都有分level, 講真我既level 都只係好低, 但我期望住升呢既時候。

Level 1: 自備環保袋, 盡量唔用膠袋--呢個真係幼稚園BB班level, 但真係好多人都做唔到。原因我認為有: A. 去買野, 收銀姐姐第一時間幫你自動入袋, 香港人習慣已成, 係縱壞左。B. 買野唔拎個袋覺得蝕左, 反正又唔使錢, 即係貪心。C. 覺得拎個袋出街好麻煩, 即係懶。

其實一個環保袋, 真係好容易,而家有好多整得靚靚既袋, 又輕又方便, 摺得細細個可能仲細過你個銀包, 袋一個o係手袋真係拎左都唔覺。如果係男士唔拎袋出街既, 一樣可以用o係屋企既舊膠袋, 摺到細細個放o係衫袋褲袋就可以啦。再唔係請大家各自使用自己既腦袋啦, 除非你係智商有問題姐如果唔係你一定有方法拎個自家購物袋出街。

唔好問我買左太多野一個袋唔夠咁就點算, 咁即係問我你太大洗一份糧唔夠用點算一樣。

好啦, 今日講住咁多先。我祝大家快D升lv, 如果你有其他好方法, 不妨過D料俾我, 交流下。