「奧比斯」(Orbis) 的故事 (真人真事)

「奧比斯」(Orbis) 的故事 (真人真事)

睇見上圖，有人又會扯火怒罵：「呢條 XX 又發乜神經呀？所謂【為善不欲人知】，駛唔駛咁揚，咁膚淺呀？」。為免唔知來龍去脈網友睇到一頭霧水，現將事情始末簡述如下，亦可聊搏一粲。

前因：

17/3/2009   有位「眼火爆」兄因對小弟出爾反爾卑劣行為 (呢頭話告別，轉眼又回歸此 blog) 睇唔過眼，激於義憤，留言譏諷，質疑何故「食言」。小弟見佢咁 upset，想攪下氣氛逗佢開心，戲言為補下佢雙目 (因爆火引致血紅)，會相贈「安寧」及「妙蓮」眼藥水各一打。誰知「眼火爆」兄真係幽默感與分析力皆嚴重欠奉，竟然專登去藥房影眼藥水相片及 post 出來，更小心計算該批藥水貨值 (共 $808.80)，叫小弟轉捐俾「奥比斯」(Orbis) (著名眼科慈善機構)，仲要求 post 張收條出來，以昭公信。建議一出，立即有位「基亞」兄大力拍和，更說為表誠意，貨值唔應該計 discounted prices，應該計「未折扣價」 ($974.40) 先。小弟即時回應話樂於遵命，但有一先決條件，就係請「眼火爆」兄將雙眼血紅 (blood shot eyes) 張相 post 出來，睇下有冇誇張失實之處。

後果：

其實只係戲言，不必太過認真。但即時小弟已有打算：如果能夠將戲言變為行善亦是美事一樁。至於請「眼火爆」兄將 blood shot eyes 張相 post 出來先至肯捐款，純屬攪笑，根本冇人預佢會咁做。小弟 18/3/2009 (即下一日) 已臨、搶錢咁腳仆去銀行入數 (費事咁零碎，麻煩銀行職員，入夠齊頭 $1000)。咁何解咁奇，特登遲 5 日，今日 (23/3/2009) 先將收條 post 出？哈哈，小弟都話有 D 被虐狂咯，咁做咪係俾足時間同機會 D「冇心人」插囉，插到佢口兼手，過足晒癮為止囉。

鳴謝：

小弟真係要多謝「眼火爆」兄，犧牲小我 (雙眼清涼福利)，成全大我 (Orbis 拯救視力事業) 無私精神，亦使小弟有多一個行善機會。另外亦要多謝「基亞」兄，熱情鼓勵小弟捐多兩百。(雖然下個月要因此多行路、少搭車、食少餐，但都係開心。)

感想：

「反南 K 型」一詞令部份網友不滿，其實當中係有天大誤解。如果某網友仍然擁南，就算點反飛馬、反 bma 、反羅都好，都絕對唔算係該類人士。大家平心而論，如果有 D 既反羅，又反南惡徒侵入呢個南華 blog 肆意撤搗亂，唔通一眾南華人仲要同佢稱兄道弟，客客氣氣？佢根本都唔係南華人，試問揭穿同責難佢惡行又點會造成乜分化呢？

小弟由 Day 1 (去年 5 月) 在此留言，已表明係不學無術 (所以咪成日「執字粒」掩飾囉) 無品小人一名，最慘仲有 D 神經添。但有一樣都幾自豪就係小弟唔攪分身，無論是譭是譽，一己概括承擔。你估小弟真係蠢到唔知「食言」躝番，一定會俾人恥笑咩？ (竟然連小小朋友 P Lau 都小弟廢 blog 中留下佢招牌七彩留言串我呀，冇陰功！你話幾醜呢！)。所以話呢，「離開很容易，要留下卻需要勇氣。」(咦，咁似董伯伯金句？) 其實如果走精面，轉個頭，是但用個新名開個新 account，又係一條「好漢」，可以扮完全冇事發生過，繼續廢嗡。但係呢 D 咁，真係恕小弟蠢，唔識做。

趁此機會，寄語「眼火爆」兄，呢個新網名咁有創意兼咁 dynamic feel，千祈唔好用幾次就從此註銷呀，好料。仲有一個卑微請求，可否告知你原來網名係邊個 (或邊幾個)，睇下又係唔係咁醒神？小弟都照足你吩咐咯，希望只係打幾隻字，你都唔好托手啦。哈哈。

夢想：

希望終有一日，所有南華人 (乜立場、作風都好) 能夠各自用自己感覺舒服方式真心擁護南華，多 D 上理性交流，唔好俾 D 「冇心人」有機可乘，上搗亂。亦希望惡意反羅/反南人士能回頭是岸，以大局為重，將反羅/反南時間同精力轉移用支持本地足球，又或者寄情於一 D「非破壞性」生趣。善頌善禱完畢，願擁護本地足球之心與你同在，多謝收睇。