水運會

 狗狗水運會舉行咗三屆，今年涼粉終於可以有份參加啦！晨咁早七點半起身，山長水遠九點鐘去到錦田，就係為咗帶涼粉參加游水比賽，去到比呢個錦田水立方狗情洶湧，估計有五至六十隻狗以拉布拉多同金毛佔大多數，隻隻狗健兒包括涼粉在內，見到個泳池已經失晒控，撲住去游水做個賽前warm up，今次比賽項目有三項：１）飛台炸水　２）潛水執寶　３）游水鬥快　涼粉就參加咗＜飛台炸水＞同游水呢！

　呢隻金毛仔就係比賽緊炸水嘞，女主人話：〔阿仔準備跳啦！〕金毛：〔我嚟啦,,,,！〕

 涼粉：〔下個就到我啦，睇住嚟啦！〕高妹阿媽記得幫我影相喎....至於身後既水哥老竇個樣明顯係緊張過涼粉！

  高妹阿媽：〔弊啦！阿仔...你咁快跳咗落水既..阿媽影唔切到炸水個樣呀！〕涼粉：〔我點知喎，見老竇掟咗個波咪跳囉，搞到我跳到咁差，老竇點算先！〕

　 涼粉：〔唔緊要，我仲有強項游水比賽，我要攞金牌！〕

　　參賽健兒既家長都用盡百寶嚟引佢地游快啲！

至於涼粉以１１秒６成功晉身第二輪爭奪三甲獎項，而涼粉排第二綫賽道，高妹就負表企對岸引涼粉游過嚟，哨子聲一響，〔涼粉...呢到呀...涼粉快啲!涼粉呢邊呀!....喂..涼粉你仲乜越游越慢呀...喂...游到咁滋油既...弊啦弊啦!...唉也!!!!!!!!] 好明顯，唔使講，大家都知結果如何啦！

　涼粉：我只係少參賽經驗啫，歉場緊有架啦，你睇我平時表現幾咁豪邁奔放，呢招深水炸旦，係咪好勁先！

　 涼粉：入水能游，出水能跳咪係我囉！　做唔到波波夫，都可以做劉翔啩！

涼粉：阿Lam你仲乜唔參加比賽既？　Lam：我唔夠評囉，要夠２０kg先受我玩喎，我齋嚟游水都一樣啫！

涼粉响等候出賽期間，咁啱就企正咗評判團隔離，佢見到其他狗狗落水比賽，自己仲未有得落水，就係咪狂吠，世估唔到就係咁樣畀涼粉成功引起評判團注意，原本兩項賽事敗北既涼粉，竟然分到個＜豬肉獎＞－〔最狂野大獎〕贏到袋狗糧，仲有個金牌添呀...開心死囉!

 嘩...仲開晒香檳放晒紙炮，嚇到水哥同涼粉幾咁驚！

　涼粉：我多謝．．Pa...唔係．．係多謝各位EE支持！

　呢隻叫Ego贏咗游水同炸水獎，佢全程咬住舊〔假蜜瓜〕好搞笑！　呢隻黑色拉布拉多已經十二歲，佢參加咗炸水比賽，獲得〔精神可嘉獎〕．

  涼粉：游左成朝水，好攰呀．．．有個金牌仔可以瞓番個好覺囉！