10-03~04-2009: Germany Trip

0345am 鬧鐘一響彈起身洗臉擦牙執嘢﹐眼耳口鼻啲嘢唔到走嗰刻唔使旨意執完。
洗臉嗰陣老爹亦起身﹐佢問陳敏送我去機場會唔會睇埋我入閘﹐我﹐“吓﹖﹗梗係唔會啦﹐佢 drop 低我就走o架啦。”
老爹﹐“咁我去嚟做乜呀﹖﹗”
我反問﹐“我都唔知你去嚟做乜。”
無耐連老媽都起身﹐得啦﹐知乜事啦﹐兩個禮拜啫﹐唔使搞到咁大陣仗呀...﹖
陳敏未到﹐把握時間同 Long Island 盡玩﹐而家已經覺得好不捨啦。
參唔多0500am 出發去 SFO﹐兩老出埋門口送我(好有壓力...)﹐Long Island 就企喺門口望住我走。
半個鐘唔使就到機場﹐先飛 Canada-Toranto 再飛 Germany-Frankfurt。
機場分 International/Domestic Terminal﹐但飛 Canada 都係去 Domestic﹐雖然話客量多當埋 Domestic﹐但有時出去玩(好似今次)要飛 Canada﹐去返 Domestic 嗰陣點都覺得仍然要(滯)留喺 US﹐有啲無癮... 
晨咁早﹐話咁快就 check-in 完畢。

入咗閘﹐剩係得一間 cafe 開賣早餐﹐當然個個排住隊買佢﹐開早半粒鐘已經賺多幾舊水。我亦唔例外排隊做水魚﹐前幾日密密食肥膩嘢﹐諗住清清地食啲綠色嘢﹐見到盒綠色沙律就攞上手﹐最多咪係我最憎嘅菠菜﹐ok 啦﹐加多幾粒 pasta 同支水﹐咁就多謝 US$14。

Pasta Salad 同我諗一樣﹐唔係咁好食﹔而個綠菜 Salad 就完全估佢唔到﹐佢唔係菠菜﹐係一種比菠菜難食 N 倍嘅菜﹗
嗰盒咁嘅綠色嘢﹐我嘗試過“逼”自己食多幾口﹐話o西咁貴﹐就咁丟真係好嘥﹐我盡咗力啦﹐兩啖。
食完再次憂心今次旅行﹐未上機已經“出師不利”...
坐多半粒鐘太陽伯伯開始做嘢﹐終於影到架機啦。

尋晚剩係瞓咗三粒鐘﹐上到機繼續瞓...
例牌要窗口位﹐影個天之餘仲有啲位俾我靠住窗口邊瞓覺。
瞓到咁上下﹐係時候打開窗望o下~

瞓咗半程﹐睇咗套 movie 就到 Toranto。
落機行去 Connecting Flight﹐呢樣好唔滿意。
雖然係轉機﹐但都要過 Canada Custom﹐唔知點解個 Custom Counters 竟然無海關﹐只有一個菲律賓婆嘅機場人員用啲非常無禮貌嘅語氣叫人分兩行嚟排﹐係咁叫人將 boarding pass 放落 passport 到方便佢檢查﹐咁當然呢樣嘢永遠無人會做齊﹐真係唔做唔俾過關咩﹖﹗
咁個賓婆見有人唔照佢意思做就慶啦﹐再(大聲)用啲鬧人嘅語氣同暗串無照佢指示做嘅人﹐其他過咗賓婆嗰關嘅人係咁望住佢﹐大部分不斷笑佢啲無禮嘅 attitude 同唔正嘅英文﹐睇睇o下終於有個男人頂唔住個賓婆﹐“Don't give me the attitude﹗”
我哋喺旁邊即刻一齊非常心涼地恥笑﹐係有聲同肯定大把人都聽到(included 個賓婆)。
賓婆即刻愕咗嘢竟然有人話佢﹐再加埋旁邊啲恥笑聲﹐然後更大聲尖叫﹐“I DIDN'T GIVE YOU ATTITUDE.  I WAS TRYING TO HELP﹗”
我哋成班企喺到嘅﹐都唔知佢“HELP” 啲乜﹐應該喺到嘅正式海關就唔見人﹐剩係見佢呼呼喝喝將人分成兩批﹐就算呢啲係你嘅工作﹐咁嘅態度邊有客“妥”你呀﹖
之後多咗個人分批帶我哋去第二個地方過海關﹐真係轉折...
過完海關一落扶手電梯就見到 BACARDI~!

我好白痴咁諗﹐“唔知係咪乜都用 Bacardi 整嘅呢﹖”
咁係人都知“唔係”啦﹐跟手望個左 - 嘩﹗
BACARDI 呀﹗﹗﹗

睇相都知 Bacardi 嘅 symbol 係蝙蝠﹐就咁睇落去就好似隻蝙蝠瞓咗喺到咁﹐呢個 installation 好得喎﹐同間 Bar 夾好o架﹖﹖

到下班機起飛大約仲有一個鐘﹐我為咗盒薯條順便買埋成個 meal﹐好餓...
見間快餐店燒嗰塊牛肉唔係咁大塊﹐所以要咗個 Double﹐點知嚟到兩塊牛肉厚到搭埋變咗 Beef Cube﹐食咗 1/3 個包已經飽﹐又係嗰句﹐見咁嘥又食埋佢。

清o西所有嘢得返 20mins boarding﹐即刻去轉洗手間(見有啲頭痛﹐去 vending machine 買埋止痛片)就嗱嗱聲排隊上機。
公司好多人都知我去旅行﹐有同事話德國人講嘢好倔無禮貌﹐我諗過會唔會好似法國人咁串﹐不過睇 forums 又話德國人好 nice﹐唔會咁黑次次撞正啲“串德”啩...
上機行去個位嗰陣(坐位排 3-4-3)﹐旁邊兩個位已經有人(兩父女﹖)。
我﹐“Excuse me, I have the window seat。”
個男毫無表情咁同我講﹐“Where you sit﹖”
咁個位係窗口位我梗係坐窗口啦﹐好友善咁指住窗口嗰面﹐“The window...”
個男繼續無表情咁同我講﹐“I know.  (指向窗口同走廊) Where do you want to sit﹖”
我突然好迷茫﹐做乜呀﹖﹗
佢無提高聲線﹐但就係同事講嘅“好倔”﹐嗰刻有啲俾佢拋窒﹐我話﹐“window...”
咁佢哋先起身俾我入去﹐一路入一路諗﹐“我做咗啲乜唔禮貌...﹖”
而無耐...shit...落雨...

廣播隨即響起﹐由於天氣關係﹐機場人員要返入中心避“雷”﹐班機大約遲二十分鐘先起飛。
好彩天氣無越嚟越壞﹐無再 delay。
飛機起飛﹐梗係繼續瞓埋佢﹐瞓瞓o下好似見到有啲嘢喺前面﹐睇真啲原來係旁邊個女仔幫我將 air line 個 head set 放落前面個袋到﹐我見到當然唔該佢啦﹐之後繼續瞓...
瞓到咁上o下俾人拍醒﹐我愕咗嘢睇o下乜事﹐原來派飛機餐﹐個女仔拍醒我等我唔使 miss 咗一餐﹐但食完成舊 beef cube 點會再食得落﹐所以剩係同空姐要咗杯水﹐點知個女仔為咗叫醒我而同我講 Sorry﹗
我幾唔好意思呀﹐佢咁好心仲同我講對唔住﹐當然我亦係咁講“It's ok + Thank you”。
Anyways﹐人哋食飯我食藥...

手痕攞個包裝嚟睇...

“When using this product...you feel faint, vomit blood, or have bloody or black stools.”
如果譯返中文...
“當你用此產品...你會暈﹐嘔血﹐或痾黑/血屎。”
講真嗰句﹐嗰刻真係唔係咁敢食...
當然最後都有食﹐又唔係第一日食止痛片。
個人醒咗啲係咁睇 movies﹐Air Canada 個 Entertainment System 唔錯喎﹐touch screen。
間中有空姐嚟派飲品﹐嗰兩父女好人到只係望到我有叫空姐嘅意慾﹐佢哋已經幫我叫個空姐仲幫我遞埋水﹗
四個字﹐“受寵若驚”。
德國人(聽到佢哋用德文講嘢)可能無乜表情無語氣﹐但原來可以咁好人﹐即係“我大聲唔代表我無禮貌”﹐我對佢哋喺啱啱上機嘅印像完全改觀﹗

啪完藥瞓咗陣確係醒神好多﹐呢個時候又有嘢食﹐早餐 - 草菇 Banana Muffin~。

個 muffin 幾好食喎﹐上面嗰幾塊香蕉乾又香又脆﹐唔錯。
食完件餅過多陣望望窗﹐嘩...好靚呀...

臨落機用臉油紙“吸油”﹐個女仔仲主動遞包紙巾嚟問我要唔要。
嘩-好人到呢~﹗
我對德國越嚟越有“信心”﹗

落機即刻揾路去 DB Travel Center meet 方梓雅。
朋友﹐好久不見~﹗