10-04-2009: Germany Trip(2)

喺大教堂外面行咗成個圈都入唔到去之後﹐睇睇時間﹐食完 lunch 都係時候返 HBF 等火車去 Berlin。
大教堂旁邊有間餐廳﹐睇落唔錯﹐最吸引我嘅係入面好似好暖﹐ 不過望兩望入面無乜人又唔敢入﹐怕唔好食。



喺外面企咗陣討論入唔入去﹐跟住見到幾個人﹐之後又見幾個入咗去﹐我同方梓雅講﹐“喂﹐有人入去o架喎。”
方梓雅﹐“係喎。”
就係咁入咗去食﹐入面﹐好暖~﹗
裝修幾有特色﹐waitress 著埋以前嗰啲鄉村裝﹐面積頗大﹐枱凳排得都幾密﹐如果全院滿坐﹐個個攞住杯啤酒嚟乾杯一定好正。
諗得太多啦﹐而家又凍又餓﹐專心睇 menu。



Tour Guide 話 Frankfurt 嘅蘋果酒(Apfelwein)係特色之一﹐當然要試。



飲落係唔錯﹐酸酸地﹐甜甜地﹐清清地有啲啤酒味。
等食其間係咁溫 tour guide﹐唔可以再好似之前咁成對盲頭烏蠅周圍撞﹗
無耐 waitress 攞住隻鑊行嚟我哋到...
嘩﹐方梓雅咁識叫嘅﹐睇個樣已經好好食。



方梓雅一食﹐成個食神樣出o西嚟﹐我忍唔住試咗舊 sausage﹐好好食呀﹗﹗﹗
德國腸真係名不虛傳﹐好食過 US 多多聲。
更加期待我個 Sauage Salad~
點知...原來我條 sausage 係“涼拌”...o架...﹖



啲 sausage 食落無咁香口﹐但一樣好食﹐蔬菜非常新鮮爽甜﹐就連擺上面嗰舊蘿白都切到成個彈弓咁﹐我真係攞咗個叉叉住佢喺到彈吓彈吓﹐好好玩。
份量好大﹐我哋食唔o西要打包。

食完 lunch 時間唔三唔四﹐去第二到又唔夠時間﹐返去 HBF 又早過頭﹐但基於外面寒風凜凜﹐我哋都係決定返 HBF 等火車。
向住車站個方向繼續亂咁行﹐啲街越行越熱鬧﹐人多就唔在講﹐店舖開得七七八八﹐比起我哋啱啱到嗰陣嘅“死城”簡直天堂與地獄﹗
行行o下見到右面有幢 Shopping Mall﹐但個外牆好似凹咗入去咁嘅...﹖
再行多幾步...嘩﹐原來個 Mall 穿窿o架﹗﹗﹗
好型呀﹗﹗﹗

繼 Frankfurt HBF 之後﹐又另一個讚嘆﹐啲 Architect 點可以咁有諗頭會設計一個穿窿 Shopping Mall﹖﹗
Mall 旁邊有舊車展﹐部部 keep 得好似新嘅一樣。

仲有勞斯萊斯(Rolls-Royce)~﹗

再行多兩步見到覺得之前要俾 EUR20 更蝕嘅嘢﹐我最鍾意嘅掃街呀-﹗
下面呢檔﹐一舊舊五花腩喺到燒。

舊舊都“色澤潤滑”~

見位姐姐用刀好快就片咗兩塊肉夾落麵包到﹐嗰兩塊肉一定又滑又 juicy﹐雖然啱啱食咗嘢﹐但我真係睇到留口水﹐奈何﹐我亦真係好飽食唔落﹗
旁邊仲有好多攤檔﹐有賣爆谷~

我嚟德國其中一個原因 - 德國腸~﹗

專賣啤酒同蘋果酒嘅攤檔。

賣 Pizza 嘅~

呢檔得意呀﹐又係賣腸賣燒肉﹐不過唔係煎﹐成個盤吊喺火上面搖嚟搖去係咁燒。

仲有呢檔...到而家都唔知佢係賣“乜”...

諗過會唔會係即場講故事俾小朋友聽﹐係又幾得意喎﹐而家仲有呢啲“賣藝”~
我哋一路行一路喺到呻笨點解要去餐廳食﹐呢到嗰啲更便更好食啦﹗
又學方梓雅嗰句﹐“算啦﹐自己旅行係咁o架啦﹐邊知道今日呢道擺 fair 呢﹖”
一路飲恨一路落樓梯搭地鐵返 HBF。
到 HBF 去 DB 問 Berlin 嘅時間表﹐順便喺入面“避寒”。
等咗參唔個45mins終於可以上車﹐今次搭 IC﹐duration 參唔多成五粒鐘﹗

呢程車辛苦囉﹗﹗﹗
唔係為搭五粒鐘而覺得辛苦﹐而係搭五粒鐘而無位坐仲要成日俾人趕覺得辛苦﹐尤其我哋啱啱落機就即刻行幾粒鐘﹐個人已經殘咗大半﹐時差關係又好想瞓﹐呢程車真係人生嘅考驗﹗
其實可以訂位﹐只係 EUR2 一個人﹐但我哋估唔到唔訂位會係咁辛苦。
見啲人個個霸頭位湧上車已經覺得奇o架啦﹐原來真係座位有限﹐我哋唯有喺走廊用行理當凳坐﹐過咗個幾鐘有人落車﹐咁我哋(已經分開)就上去坐﹐順便瞓返陣﹐瞓瞓o下俾人叫醒話個位佢留咗﹐我即刻講o西唔好意思彈起身﹐過粒鐘又有位空出嚟﹐我又上去瞓﹐之後起身去洗手間撞到方梓雅﹐奇怪點解佢係另一個車箱行個嚟﹐“點解你喺到嘅﹖”
方﹐“頭先我俾人叫起身話嗰位佢留咗﹐咁無位咪坐走廊囉﹐個查票員見我坐喺走廊到瞓所以叫我坐入去﹐有兩個位呀﹐過嚟叫埋你。”
我﹐“但我哋去到都俾人坐咗啦。”
方﹐“唔係呀﹐佢而家喺嗰到幫我哋霸住個位呀。”
我﹐“咁好人﹖﹗”
我哋即刻攞o西行理行過去﹐見到查票員姐姐嗰刻真係好似見到天使咁感動﹐終於可以舒舒服服坐唔使俾人趕啦。

五個鐘過後到達 Berlin HBF﹐即刻上電梯揾 S Bahn 搭去 hostel﹐一上樓上﹐呢個係 Train Station﹖﹗Mall 呀嘛﹖﹗
好多商舖好多嘢賣﹐但呢刻無心情行啦﹐嗱嗱聲揾 S Bahn﹐揾咗好耐﹐終於都係要問 DB﹐估唔到 S Bahn 原來喺最高嗰層﹐仲要睇個顯示牌先知你要搭嗰條線喺邊個月臺。
個 HBF 設計又係一絕﹐Long Distant Train 嘅路軌喺最低嗰層打直咁行﹐中間幾層有圍住圓形嘅商舖﹐S Bahn 就喺最頂嗰層打橫咁去﹐呢啲建築物唔係喺戲入面嘅未來世界先有咋咩﹖﹗
揾啱月臺上到去﹐好靚呀﹗﹗﹗

又係透明玻璃頂﹐又係最高嗰層﹐呢個唔係火車站﹐景點嚟o架嘛﹖﹖﹖﹗﹗
中間堆白色字無因為個玻璃頂顯得遜色﹐反而對比十分明顯﹐我究竟去咗邊到旅行﹖啲環景咁似拍緊科幻片嘅﹖﹖
由月臺透過玻璃頂望過去幢 DB﹐好有氣勢呀~﹗

搭幾個站就到﹐我哋跟住 Hostel 教嘅 direction 揾路﹐行過一條比較多人同光嘅街後就變得好黑同好冷清﹐direction 又無教要行幾耐﹐剩係話大約行 xx米就喺邊到轉﹐我哋都唔知行幾耐先係幾多米﹐唯有一直係咁行﹐不過最後都係要問人先揾到間 hostel。
第一次住 hostel﹐其實環景唔錯﹐我覺得好似自己間房﹐幾有歸屬感吖﹐係要同人 share bathroom 啫。

沖完涼﹐大家都好認真咁 plan 聽日嘅行程﹐“聽日唔可以好似今日咁”係我哋嘅目標﹗