10-04-2009: Germany Trip(1)

到咗 Frankfurt Airport﹐喺 DB Reisezentrum (Travel Center) 同方梓雅會合﹐跟手入 DB activate 張 German Rail Pass﹐之前睇 forums 話上面啲資料要自己填上去﹐唔係上到火車﹐查票員可以唔俾你用﹐咁喺排隊嗰陣就順便填o西佢﹐點知...
去到 Counter﹐俾張 rail pass 俾 DB Staff﹐條友睇咗第一頁﹐再揭第二頁﹐然後﹐“This is wrong。”
我即刻呆咗﹐“吓﹖”
DB Staff 仍然望住張 pass 係咁搖頭﹐但又唔講落去﹐我呆咗喺到﹐張 pass 成 US$455﹐錯﹖﹗
我懵到唔知點問﹐“What...﹖How...wrong﹖”
DB 繼續搖頭﹐“This is wrong.  Why you do that﹖”
我同方梓雅仍然唔知發生乜事﹐方梓雅再問 DB 張 rail pass 點錯﹐原來第一日用 rail pass 嘅日子唔係自己填上去﹐一定要由 DB Staff 填﹐我頂﹗
你唔係同我講張 US$455 嘅 rail pass 唔用得呀嘛﹖﹗
DB 話可以改﹐但係要俾 EUR20 extra charge﹐蝕﹗
方梓雅係咁安慰我﹐“算啦﹐自己出嚟玩係咁o架啦﹐張 rail pass 咁嘅價﹐而家俾多廿蚊﹐ok 啦。”
但係諗住好手尾填埋佢﹐點知變咗衰多手俾多 EUR20﹐蝕呀﹗

蝕都係要俾﹐搞完張 pass 就揾 train 出去市中心﹐呢樣真係好迷茫。
Airport Station 分兩種月臺﹐一個 for Long Distance﹐一個  for Region Train﹐咁我哋剩係去市中心﹐應該去 Region Train 嗰面﹐但我哋唔識睇時間表﹐啲售票機又無路線地圖﹐上面啲字又係德文﹐又無我哋要去嗰個地方名﹐都唔知點搞﹐最後是但落一條電梯落 platform﹐落到去見到塊電腦板更加迷茫﹐個 platform 似乎無我哋要搭嘅 train﹐我哋再俾心機睇黏喺告示板嘅時間表﹐終於睇到有班車去 Frankfurt Hauptbahnhof(HBF)﹐而我哋終於識上返去再落另一個 platform﹐見仲有幾分鐘即刻入便利店買返支水﹐我就嚟渴死啦。
之前聽說呢到啲水仲貴過啤酒﹐一睇個價﹐果然名不虛傳...



EUR2.25 再加 EUR0.25 回收費﹐一支 .5L嘅水要成 US$3.75﹗
買完水我哋搭嗰架 train 就到﹐見啲人係咁按隻門﹐先留意到門上面有個開關掣﹐你要按個掣道門先開。





雖然上咗車亦知道要去 Main Station(HBF) 放行理落 locker﹐但其實仲未決定之後去邊﹐而呢刻喺邊個站落車都唔清楚﹐個人簡直亂到唔識諗嘢。
所以問咗坐我哋附近嗰對德國情侶﹐睇吓會唔會有幫助。我哋想知喺邊個站落車﹐同埋有邊啲地方係必去之地。對情侶非常好人﹐教我哋喺邊個站落車﹐見我哋係女仔就推薦 Goethe Str.﹐成條街都係賣名牌。我哋即刻謝過情侶﹐但 Goethe Str﹐算把啦﹐咁嘅身世仲買名牌﹖﹗
個男友望多幾望﹐“Sorry, I'm curious.  The streets in your book are in Chinese, too﹖”
我話﹐“Yea~” 然後成個 map 遞俾佢睇﹐文化交流~
到 HBF 嗰陣情侶仲好心提我哋落車﹐一落車﹐望咗兩望﹐呢個就係 Frankfurt Main Station 啦﹖﹖﹗﹗
好靚呀﹗﹗﹗
一排過廿幾條 tracks﹐除咗有啱啱搭嘅 Region Train﹐仲有 IC 同 ICE﹐超型呀﹗﹗
(當然我部 SD600 盡其量只影到幾條軌...)



建築設計又型﹐其實呢個 HBF 可能已經好舊﹐因為我見大堂個鐘都幾舊吓﹐但呢啲歐洲式設計勝在樓底夠高﹐所以就算舊睇落都好 Grand﹐仲有個玻璃頂俾天然光射入嚟﹐睇落對眼真舒服呢。



又係成個盲俠咁喺 HBF 揾 locker 放行理﹐見到有 DB Service Point﹐即刻走過去問﹐呢個 trip 如果無咗 DB 都唔知點算。
問到位置揾到排 locker﹐只要投幣EUR4 就可以放成日﹐但﹐我哋無 coins﹗
今次真係千算萬算都唔知 coins 係咁有用。
唯有揾吓有無 machines 專唱散銀﹐但無囉﹐只有一個辦法你先可以攞到銀仔﹐就係買嘢找錢。
幾經辛苦先唱到幾蚊﹐每人 EUR2 一個 locker 擺o西所有行理﹐然後嗱嗱聲落 S/U Bahn 搭地鐵﹐落去又係咁揾搭乜線去乜站﹐點解個路線圖揾得咁艱辛o架﹖﹗
搞咗一輪先解決到呢個問題﹐都唔記得最後喺邊個站落車啦﹐但一上到上面﹐第一句從我口講嘅嘢係﹐“死城。”



上到去乜都未開﹐人得幾丁﹐剩係有好大同好凍嘅風吹住你﹐我哋不斷安慰自己﹐“星期日係咁o架啦” “我哋早啫。”之類嘅說話。
死城到﹐空擴到都唔知點行同向邊行﹐終於﹐見到我哋嘅曙光﹐指示牌﹗
個牌上面印有部份景點簡介同埋有一點喺地圖上面﹐講真﹐我睇到眼都花﹐最後都懶得望﹐跟住指示牌箭嘴個方向就行啦﹐過咗一條街之後又陷入迷失狀態﹐好彩方梓雅記得啲街名﹐我哋再盲摸摸咁行。
其間見到幢 building 掛咗張老人相喺外牆﹐點睇都唔似賣緊廣告﹐所以我諗可能係art﹐影咗張相~



繼續行﹐終於覺得自己係旅行-ing啦﹗









上面啲建築物咁有特色﹐但我到而家都唔知嗰到係邊到﹐但肯定已經入咗 Romer Pl. 範圍﹐再行落啲就去咗舊市政廳(Romerberg)嗰頭啦。
一見下面排屋就諗起﹐“嘩﹐藍罐曲奇呀﹗”



呢個就係舊市政廳﹐其實入面可以參觀﹐但咁啱入面擺 fair﹐所以...算啦。



再向後望﹐個教堂咁熟口面嘅...﹖
揾揾本 tour guide﹐原來真係大教堂(Kaiserdom)。



無即時行過去﹐我哋再行落啲睇o下有乜睇﹐上埋 Eiserner Steg(鐵橋)過河到對面。我哋真係好勇﹐上到橋啲風速大過樓下成倍﹐溫度起碼低兩度﹗
咁風景﹐係唔錯嘅...



我哋行完條橋﹐諗住睇o下對面有乜睇﹐喺個指示牌講完一輪﹐都係行上橋返轉頭﹐原來對面嘅風景就係所謂嘅金融景點﹐銀行大廈。



我哋無去睇﹐呢啲高樓大廈喺HK仲睇唔夠﹖
學方梓雅嗰句﹐“影咗當去過。”
就嚟落返橋先見到﹐蒸氣火車﹖﹗我都想坐~



之後開始又亂咁逛﹐係咁入啲橫街巷仔﹐有間舖頭全部都係買貓嘅精品﹐想入去睇吓買第一份戰利品﹐點知無開﹗



繼續亂逛﹐幢建築物幾型喎﹐成個肥圓柱體﹐入面裝修都好靚﹐原來係餐廳。



之後向大教堂進發﹐行到“山腳”已係睇得出個教堂有幾“大”﹐點解咁多建築物都起到咁高o架﹖我部 SD600 根本影唔o西﹐成日都要好似分屍咁影。



如果大家覺得張相影得都唔差﹐我想話﹐張相比起本身幢建築物﹐個氣勢連百份之一都無﹐我都覺得影到對唔住大教堂呀。



係咁揾路想入去參觀﹐但行咗個圈都唔知點入去﹐最後又係放棄。