咖啡洗白白

橫風橫雨嘅星期六，我猶豫緊仲帶唔帶咖啡去沖涼，因為都未出面口，我只係拎左個cage出黎，諗住等咖啡熟習下，襯佢自己八八卦卦行左入去順手close the door，無耐後咖啡已經好似知道要出街咁，不斷發出不安嘅喵喵叫，心諗打晒雷咁仲帶佢出去咪嚇死佢？好在之後天氣開始好轉少少，無再打雷同啲雨細左好多，於是我就同咖啡一人一貓咁齊齊出門口！

上到的士咖啡好驚咁瑟縮喺cage後部自己捲埋一舊，知佢好驚但係都無辦法，唯有不斷嘗試安撫佢！點知去到間舖頭竟然未開門！！！吓？？唔係掛？我約好左時間架喎！！無奈地等左約十分鐘終於有人番黎，話塞車所以遲左喎！

交低咖啡時順便叮囑咖啡超驚，佢係對四周環境好敏感嘅貓貓，要好好睇住佢！跟住就懷住依依不捨嘅心情離去，希望今次沖到啦！

等待期間一路擔心無端端收到電話話咖啡沖唔涼呀，或者有咩事咁？無驚無險可以去接番佢，見到咖啡都係瑟縮喺cage後部，負責人話咖啡好醒，識揀人黎恰，上次沖涼好似走鬼咁通屋走，佢形容到好似要捉雞咁捉番咖啡都幾搞笑；今次做足準備咖啡當然走唔甩，恰唔到人唯有乖乖就範！不過焗乾啲毛時咖啡不斷意圖想撞開個籠，結果撞瘀左個鼻（見到個鼻有紅豆咁大嘅暗紅點），心痛固然有啦！不過見咖啡都無乜大礙，同埋應該唔關個負責人事嘅！不過負責人話咖啡啲死毛好勁，梗係！平時幫佢梳毛都唔制！梳兩梳就喵走我！！！所以一沖完涼咖啡啲毛又滑左同埋感覺上真係好似薄左，當堂輕盈左，咭咭～～

順便問埋熊貓咖啡互‘啡’問題，上次熊貓沖完涼差唔多事隔一個月都仲‘啡’緊，負責人話可能咖啡沖左涼會好啲，因為而家佢自己都有嗰浸shampoo味喎（熊貓沖完咁耐仲有味？）！望就咁望啦！！不過佢話下次拎個cage出黎可能咖啡會好醒知道要去沖涼就閃定先，叫我得閒擺下空城計喎！！狼來了～～～

番到屋企，為免兩貓一埋身就發生互‘啡’戰，唯有擺住咖啡喺cage入面，等熊貓隔住道門大家互相索下先！不過咖啡一番到屋企好似去番熟番地方咁（好在佢仲認得），不斷喺道門撩黎撩去好似想出黎咁，我又諗住佢出左去成個晏晝又未食嘢，可能又想去廁所，於是放左佢出黎；點知佢出左黎又ok喎！自己好悠然咁搵個位攤抖，反而熊貓八卦走入去cage，當時我又趕住番娘家食飯，怕佢兩個無人在場又埋身肉搏，嗰下唯有熊貓捱下義氣，硬生生困左喺個cage幾個鐘！對唔住啊！番黎拿拿臨放番佢出黎，暫時兩貓依然有互‘啡’，不過好似無‘啡’得咁勁！但係我試左幾次意圖放熊貓喺咖啡隔離，熊貓係會掙扎走人呀！！暫時依然有你無我咁，唉～～～