媽媽的心事

我唔介意小黃生做錯功課或寫字錯 . 一頁字 , 同佢協議我只改佢3個字 , 佢又提出要改嘅3個字 , 咁就算喇 ! 而家佢D字好肉酸架 , 不過整齊我已經覺得足夠 .

我記得阿仔讀1,2年班時 , 我教佢做功課幫佢默書 , 我發覺我好忟 , 成日鬧佢 . 於是我好好反省 , 覺得阿仔不是常見到我 , 但每次見到我 , 我都係鬧佢 , 咁樣我就忟死 , 佢就見親我都唔開心 , 於是我真係放手 . 請個補習老師同佢補習 , 係我接佢返屋企前就補好習做晒功課 , 我亦唔會再睇佢功課 , 亦唔會再同佢默書 . 佢返到屋企我就同佢傾偈 , 一齊睇電視 , 親子關係好過之前 . 佢去學嘢我只會去睇 , 去欣賞 , 去讚佢 , 但我絕不會好似你咁篤住佢去練篤住去教佢 , 我只會俾機會佢去發揮 , 唔係迫佢成為某方面嘅專家 , 因為我相信只要佢喜歡佢自然會努力練習 , 佢唔係為我去做人 , 佢係為佢而活 . 只要佢提出唔學, 能提出原因 , 我會俾佢 , 佢話要學乜我又會俾佢 .

我會鬧佢 , 不過不會成日鬧 , 我會同佢協議左先 , 亦俾好大嘅信任佢 . 我成日教佢要守信用 , 一違反信用我先罰 . 佢嘅嘢我從來唔會偷睇 , 攞乜我都會問準佢 . 我要做個榜樣俾佢睇 , 我嘅嘢都會同佢講 , 約人會話俾佢聽 , 大概幾時返亦會同佢講 . 只要無老師投訴 , 成績無退步 , 我唔會干涉佢嘅課外活動 . 而家我都會行使母親嘅權力 , 但亦有時會待佢好平等 .

每個小孩子都有獨特個性 , 我亦講唔晒我點對佢 . 有D原則性嘅嘢我對小黃比任何人都固執同嚴格 ; 有時我又好似唔係好理佢 . 睇下係乜事同乜情況 . 教仔女沒有方程式 , 小黃得嘅方法對你個仔又未必啱洗 . 我十分相信小孩子都有天性 , 小黃剛巧係一個乖孩子 . 不過 , 我從來唔會俾佢因扭計而得逞 , 因我心腸比石頭還硬 .

你同你老公講 , 其實我不是一個稱職嘅母親 , 我亦無乜可教 , 因為其他人聽見我咁教仔都覺得有D怪 . 唯一可解釋係我個仔一生出黎就係乖仔囉 . 哈哈 !